Nibura abantu 41 bapfiriye mu mpanuka y'ubwato mu Kiyaga cya Tanganyika

Abantu nibura 41 bapfuye, naho abandi 49 bararokorwa, nyuma y’uko ubwato burohamye mu Kiyaga cya Tanganyika muri Repubulika ya Demokarasi ya Congo (DRC).
‎
Norris Mulongoyi, Minisitiri ushinzwe ubwikorezi mu ntara ya Tanganyika, yabwiye Ibiro Ntaramakuru Associated Press (AP) ko ibikorwa byo gushakisha abandi bagenzi bikomeje.
‎
Bivugwa ko ubwo bwato bwari butwaye abantu bagera ku 100 n’imizigo ubwo bwarohamaga hafi y’icyaro cya Mapera muri Congo. Ubwo bwato bwari buvuye ku cyambu cya Kigoma muri Tanzania bujya mu Mujyi wa Kalemie muri Congo ubwo bwarohamaga kuri uyu wa Kane ushize.
‎
Umwe mu barokotse witwa Annie Moyoni yabwiye Radio Okapi, iterwa inkunga n’Umuryango w’Abibumbye, ko abagenzi bakangutse ahagana saa saba z’ijoro (1am) basanga ubwato bwatangiye guhengamira ku ruhande rumwe.
‎
Ntabwo biramenyekana neza icyateye ubwo bwato kurohama, ariko abantu babarirwa mu magana bagiye bapfa mu mpanuka z’amato muri DRC mu myaka ishize, nk’uko AP ibivuga.
‎
Akenshi amato ajya arenza urugero rw’imitwaro abasha kwikorera kandi akaba adafite ibikoresho birinda kurohama (life jackets). Ku bantu benshi muri DRC, gutembera cyangwa gukora ingendo hakoreshejwe ubwato ni bwo buryo buhendutse kandi bworoshye.
‎
Iki gihugu kiri mu bikennye cyane ku Isi kandi gifite ibikorwaremezo bidahagije ku baturage bacyo barenga miliyoni 100.
‎
Uku kurohama kw’ubwato ni ukwa kabiri mu gihe kitageze ku kwezi kumwe, ubwato bwo muri Congo burohama mu nzira hagati ya Kigoma na Kalemie.
‎
Ku wa 28 Kanama, ubwato bwo muri Congo bwitwa MV Pacifique bwarahiye buraturika ubwo bwari ku cyambu cya Kigoma buri gupakira lisansi, nk’uko bitangazwa na Radio Okapi.