Igihugu cya Uganda kiratekereza kugirana amasezerano y’imyaka itanu n’u Burusiya agamije gukomeza kwigisha abasirikare bacyo ururimi rw’Ikirusiya, mu gihe ibihugu byombi bikomeje gushimangira ubufatanye mu bya gisirikare.
Uyu mushinga watanzwe na Maj Gen Sergei Marchuk wo mu gisirikare cy’u Burusiya, ubwo yahuraga na Perezida wa Uganda, Yoweri Museveni, i Entebbe ku wa 9 Ukwakira 2026.
Amakuru yatangajwe agaragaza ko gahunda izakorwa n’abarimu batanu b’Abarusiya, aho amahugurwa ateganyijwe kongera gutangira ku wa 1 Ukuboza 2026, mu gihe amasezerano azaba yemejwe.
Uretse kwigisha ururimi, u Burusiya bwafashije Uganda mu gushyiraho ibikorwaremezo bya gisirikare birimo ahakorerwa ibikoresho bya gisirikare, ahasanirwa ibikoresho ndetse n’ibigo byihutirwa mu guhangana n’ibibazo by’umutekano.
Perezida Museveni yakiriye neza iki cyifuzo, ashimira u Burusiya ku bufasha bukomeje guha igihugu cye mu bya gisirikare.
Gusa, kugeza ubu, aya masezerano ntarashyirwaho umukono, bivuze ko gahunda yo kuyashyira mu bikorwa igitegereje kwemezwa burundu.