Umurwa Mukuru wa Ethiopia, Addis-Abeba, waraye wumvikanyemo guturika kwinshi kuri guhuzwa n'ibitero bya drone bishobora kuba byagabwe kuri uriya mujyi, mu gihe intambara yongeye gukaza umurego mu majyaruguru y’igihugu.
Amaturika yumvikanye mu bice bitandukanye by’umujyi mu ijoro ryo ku wa Gatatu rishyira kuri uyu wa Kane, tariki ya 1 Ukwakira 2026, nk'uko abadipolomate batatu babihamirije Ibiro Ntaramakuru 'Reuters'.
Ibi biro by'Abongereza bivuga ko isoko rifitanye isano n’ihuriro ry’imitwe irwanya Guverinoma ya Minisitiri w’Intebe Abiy Ahmed ryavuze ko iryo huriro ryagabye "ibitero byinshi bya drone i Addis-Abeba", ndetse ko bimwe muri byo byari bigamije icyicaro gikuru cy’ingabo za Ethiopia.
Reuters icyakora ivuga ko itashoboye kugenzura ayo makuru mu buryo bwigenga.
Kugeza ubu yaba Guverinoma ya Ethiopia n’igisirikare ntibaragira icyo batangaza ku guturika kwabayeho.
Ibitangazamakuru by'imbere muri Ethiopia bivuga ko nyuma ya saa sita z’ijoro, i Addis-Abeba humvikanye guturika inshuro eshatu, mu gihe igihugu kiri mu bihe bikomeye by’umutekano kubera imirwano ikomeje mu majyaruguru yacyo.
Umwe mu bayobozi b’urwego rw’ubutasi rwa Ethiopia yabwiye The Associated Press ko ayo maturika yabayeho, ariko ntiyatangaza icyabiteye.
Aya makuru aje nyuma y’uko urwego rw’ubutasi rwa Ethiopia, National Intelligence and Security Service (NISS), rutangaje ku wa Gatatu ko ruhagaritse ingendo za drone muri Addis-Abeba no mu nkengero zayo, kubera impamvu z’umutekano.
Ibi bibaye kandi mu gihe ihuriro ry’imitwe irwanya Guverinoma ririmo Tigray People’s Liberation Front (TPLF) hamwe n’indi mitwe itandatu yitwaje intwaro, riheruka gutangaza umugambi wo gukuraho ubutegetsi bwa Abiy Ahmed.
Mu busanzwe iyi mitwe ntiyari isanzwe izwiho gukoresha drone z'intambara, ariko ko hari ibimenyetso bigenda byiyongera by’uko ishobora kuba ifite ubwo bushobozi.
Ku wa Kabiri, ingabo za Leta zatangaje ko zafashe ibice bya drone ndetse na za batiri bivugwa ko byari bifitwe n’abarwanyi bafitanye isano na TPLF.
Mu gihe ibitero bya drone kuri Addis-Abeba byaba byemejwe, byaba ari ubwa mbere bimenyekanye ko imitwe irwanya Guverinoma igabye igitero nk’icyo kuri uriya murwa mukuru wa Ethiopia uri kure cyane y’ahantu imirwano ikomeye iri kubera mu ntara za Tigray, Amhara na Afar.