Ikipe y’Igihugu y’u Rwanda 'Amavubi' yaciye agahigo ku rutonde rushya rw’amakipe y’ibihugu rwa FIFA rwasohotse ku wa Gatatu tariki ya 7 Ukwakira 2026, nyuma yo kuzamuka imyanya icyenda, ikaba ari yo kipe yazamutseho imyanya myinshi kurusha izindi kuri uru rutonde, umuhigo isangiye na Dominican Republic.
Amavubi yazamutse ava ku mwanya wa 128 ku Isi agera ku wa 119, nyuma y’umusaruro mwiza yabonye mu mikino yo gushaka itike y’Igikombe cya Afurika cya 2027.
FIFA yatangaje ko u Rwanda na Repubulika Dominikani ari zo kipe zombi zazamutseho imyanya myinshi kuri uru rutonde, aho buri imwe yazamutseho imyanya icyenda.
Iri zamuka ry’Amavubi ryagizwemo uruhare rukomeye n’umusaruro yabonye mu mikino iheruka, by’umwihariko intsinzi ya 2-1 yakuye kuri Cape Verde mu mukino wo gushaka itike ya AFCON 2027.
U Rwanda kandi rwari rwabonye umusaruro mwiza imbere ya Liberia rwatsinze ibitego 3-1, ibintu byatumye rwunguka amanota akenewe kugira ngo ruzamuke cyane ku rutonde rwa FIFA.
Mu yandi makipe yazamutse cyane muri Afurika harimo Guinea-Bissau yazamutseho imyanya umunani igera ku wa 124, Gambia izamuka irindwi igera ku wa 109, Botswana izamuka itandatu igera ku wa 141, mu gihe Mozambique yazamutseho itanu igera ku wa 98.
Ku mwanya wa mbere ku Isi haracyari Espagne, nyuma yo gukomeza kwitwara neza kuva yatwara Igikombe cy’Isi cya 2026. Argentina iri ku mwanya wa kabiri, u Bufaransa ni ubwa gatatu, u Bwongereza ni ubwa kane, na ho Portugal yazamutse imyanya ibiri igera ku wa gatanu.