Minisiteri y'Ububanyi n'Amahanga ya Amerika yategetse bamwe mu badipolomate n'imiryango yabo kuva muri Arabia Saoudite mu gihe ibitero bikomeje kwiyongera, ndetse abantu batatu bakaba baguye mu bitero hirya no hino mu gihugu.
Umuvugizi wa Minisiteri y’Ububanyi n’Amahanga ya Amerika mu itangazo ryashyizwe ahagaraga yategetse ko abakozi badakenewe cyane ba Ambasade ya Amerika n'imiryango yabo bava muri Arabia Saoudite.
Yakomeje agira ati: “Abahouthi bashyigikiwe na Iran bakomeje kwishora mu ntambara na Arabia Saoudite, harimo ibitero ku bibuga by’indege bya gisivili n’ibindi bikorwa remezo bikomeye bivamo impfu z’abaturage no guhungabanya ingendo bikomeye.”
Umuvugizi kandi yatanze n’umuburo avuga ko "amakimbirane ashobora gufata intera vuba cyane".
Abayobozi ba Arabia Saoudite bavuga ko ibice by'indege itagira abapilote yarashwe mu gihe yageragezaga kugaba igitero ku ku iriba ry'ibikomoka kuri peteroli, byahitanye abantu babiri, naho umuntu umwe apfa nyuma y'igitero cyagabwe ku kibuga cy'indege mpuzamahanga cya King Fahd i Dammam.
Intambara hagati y'aba Houthi bashyigikiwe na Iran muri Yemen na Arabia Saoudite yakomeje kwiyongera mu kwezi gushize. Aba Houthi basubije ibitero bya Arabia Saoudite batera ibisasu bya misile na drones ku bibuga by'indege, ku bigo by'ingufu n'ibirindiro bya gisirikare muri Arabia Saoudite.
Igitero giherutse kugabwa ku Kibuga cy'Indege Mpuzamahanga cya Riyadh ni cyo cyahitanye abantu benshi mu bwami muri iyi myaka ishize.
Abayobozi batangaje ko mu gitero giheruka kugabwa ku Kibuga cy’Indege Mpuzamahanga cya King Fahd, abantu umunani bakomeretse, aho bamwe bakomeretse byoroheje abandi bagakomereka bikomeye.
Kugeza ubu nta bisobanuro birambuye byatanzwe kuri icyo gitero, ariko kibaye mu gihe ibibuga by’indege muri Arabiya Saoudite bikomeje kugabwaho ibitero inshuro nyinshi n’abarwanyi b’aba-Houthi.