Brig Gen Patrick Karuretwa, Umuvugizi w’Ingabo z’u Rwanda (RDF) akaba n’Umuyobozi Mukuru ushinzwe Ubutwererane Mpuzamahanga mu bya Gisirikare muri Minisiteri y’Ingabo, uyu munsi yagejeje ikiganiro ku bitabiriye amahugurwa ahuje abakozi ba Leta muri gahunda yiswe “National Induction Programme” abera mu Kigo cy’Amahugurwa ya Gisirikare cya Gabiro, mu Karere ka Gatsibo. Iyi gahunda igamije gukomeza kunoza imikoranire, ubufatanye no kubazwa inshingano hagamijwe gutanga serivisi nziza zishyira umuturage ku isonga no kugera ku ntego z’iterambere ry’igihugu.
Iki kiganiro cyari gifite insanganyamatsiko igira iti: “Kuva ku Cyerekezo cy’Igihugu kugera ku nshingano zo guteza imbere abaturage”, cyibanze ku nshingano z’abakozi ba Leta mu guhindura icyerekezo cy’igihugu mo gahunda n’ibyemezo bifatika bigamije guteza imbere imibereho y’abaturage, guteza imbere inzego za Leta no gushyigikira iterambere rirambye.
Aya mahugurwa azamara ukwezi kumwe, azitabirwa n’ibyiciro bine, aho buri cyiciro cyigizwe n’abagera kuri 200 baturuka mu nzego zitandukanye za Leta. Abitabiriye iyi gahunda bazahabwa ibiganiro bitandukanye bizibanda ku ngingo z’ingenzi zirimo Icyerekezo cy’u Rwanda cya 2050 na Gahunda ya Kabiri y’Igihugu yo Kwihutisha Iterambere (NST2).
Ageza ikiganiro ku bagize icyiciro cya mbere, Brig Gen Patrick Karuretwa yashimangiye ko abakozi ba Leta bafite uruhare rukomeye mu iterambere ry’igihugu. Yagaragaje ko iterambere ry’u Rwanda rishingiye ku bwitange bwabo mu gukorera abaturage, ubushobozi bwo guhuza imikorere yabo n’ibyifuzo by’abaturage no gufata ibyemezo bihamye bigirira akamaro abaturage.
Brig Gen Karuretwa yagize ati: “Inzego za Leta ni zo zikoreshwa mu guhindura icyerekezo ukuri kugaragara. Iyo zitabayeho, Icyerekezo 2050 cyaba inyandiko nziza ibitse mu kabati. Icyerekezo 2050 ntigishingiye gusa ku mafaranga abantu binjiza. Intego yacyo ya kabiri ni uko buri Munyarwanda agira imibereho myiza, kubaho igihe kirekire kandi ufite ubuzima bwiza, kubona akazi keza, gutura mu nzu igezweho, kugira umutekano no kugeza serivisi nziza ku muturage aho kugira ngo abe ari we usiragira azishakisha.”
Atanga urugero rufatika ku Ngabo z’u Rwanda (RDF), Brig Gen Karuretwa yasobanuye ko NST2 ishyira amahoro n’umutekano mu nkingi y’imiyoborere ihindura imibereho y’abaturage, kandi ko ari na byo RDF ishyize imbere mu nshingano zayo z’ibanze.
Yashimangiye ko RDF isobanukiwe neza ko ikorera abaturage, bityo ko ari yo mpamvu buri mwaka binyuze muri Gahunda y’Ibikorwa by’Inzego z’Umutekano mu iterambere, abasirikare, abaganga n’abahanga mu by’ubwubatsi bakorana n’abayobozi bo mu nzego z’ibanze mu rwego rwo kuzamura imibereho y’abaturage, bityo bikagira uruhare mu iterambere ry’igihugu.
Yasabye abitabiriye aya mahugurwa gutekereza ku buryo imirimo bakora buri munsi ihuzwa n’intego z’iterambere igihugu cyihaye n’uko bashobora guharanira ko iyo mirimo itanga umusaruro ufatika ku baturage.
