Ikipe yo muri Espagne, FC Barcelona, yahagaritse ibiganiro by’ubufatanye na Guverinoma ya Repubulika Iharanira Demokarasi ya Congo (RDC), nyuma y’uko umubano hagati y’impande zombi uzambye, ubu ikaba iri mu biganiro na Tanzania.
Aya makuru yatangajwe na Africa Intelligence ku wa 25 Nzeri 2026, avuga ko Barcelona iyobowe na Joan Laporta iri mu biganiro byimbitse na Tanzania, kimwe mu bihugu bitatu bizakira imikino ya AFCON 2027.
Barcelona yari ifitanye na RDC amasezerano y’ubufatanye yasinywe mu 2025, yari afite agaciro ka hafi miliyoni 43 z’amayero. Aya masezerano yari agamije kumenyekanisha RDC no guteza imbere ubukerarugendo bw’iki gihugu, aho izina “R.D. Congo, cœur de l'Afrique” ryashyirwaga ku myambaro y’imyitozo y’iyi kipe.
Gusa, ubufatanye bwaje kuzamo ibibazo birimo kutumvikana ku bantu bagombaga kuba abahuza muri ayo masezerano ndetse n’amafaranga yagombaga kwishyurwa. Africa Intelligence ivuga ko Kinshasa yari yarahagaritse kwishyura amafaranga y’umwaka wa kabiri w’amasezerano, kugeza igihe ikibazo cy’abahuza n’uruhare rwabo mu masezerano cyari gukemukira.
Nyuma y’uku kudahuza, Barcelona yahisemo guhagarika ubufatanye na RDC, ahubwo itangira ibiganiro na Tanzania.
Amakuru avuga ko ibi biganiro biri gukorwa hagati ya Barcelona n’abayobozi ba Tanzania, by’umwihariko binyuze i Dodoma, ndetse bikaba bikurikiranywe n’Umunyamabanga cyangwa Minisitiri ufite mu nshingano amakuru, umuco, ubuhanzi na siporo muri Tanzania, Paul Makonda.
Tanzania iri mu bihugu bitatu bizakira AFCON 2027, hamwe na Kenya na Uganda. Iki gihugu kandi kiri mu myiteguro yo kwakira iri rushanwa, ibintu bishobora gutuma ubufatanye n’ikipe ikomeye nka Barcelona buba uburyo bwo guteza imbere siporo n’ubukerarugendo.
Kugeza ubu, nta masezerano mashya ya Barcelona na Tanzania aratangazwa ku mugaragaro. Ibiganiro biracyakomeje, mu gihe ubufatanye bwari hagati ya Barcelona na RDC bwo bwahagaze nyuma y’ibibazo byavutse hagati y’impande zombi.