Bwiza

HRW yakosoa mpango wa nchi za EU kuwapeleka nchini Rwanda waliotuma maombi ya hifadhi

Siasa•
Fred Rugira
By Fred Rugira
•Kuwa Kabiri, 17 Ugushyingo 2026 saa 12:48
HRW yakosoa mpango wa nchi za EU kuwapeleka nchini Rwanda waliotuma maombi ya hifadhi

Shirika la kimataifa linalotetea haki za binadamu, Human Rights Watch (HRW), limekosoa mpango wa nchi tano wanachama wa Umoja wa Ulaya (EU) wa kupeleka nchini Rwanda watu waliotuma maombi ya hifadhi lakini wakanyimwa, likisema kuwa mpango huo unakinzana na misingi na maadili ya EU.

Tarehe 16 Novemba 2026, Austria, Denmark, Ujerumani, Ugiriki na Uholanzi zilithibitisha kuwa mazungumzo kuhusu mpango huo yanaendelea. Hayo yalitangazwa baada ya mkutano uliojadili suala la wahamiaji uliofanyika jijini Vienna, Austria.

Inatarajiwa kuwa wahamiaji hao wataanza kupelekwa nchini Rwanda mwaka ujao wa 2027.

HRW inasema kuwa mpango huo unaweza kuhatarisha haki za wahusika, ikizingatia msimamo wake kwamba Rwanda haizingatii haki za binadamu. Inaongeza kuwa Rwanda huwaadhibu au kuwanyamazisha watu wanaoikosoa Serikali, wakiwemo wanaharakati wa kutetea haki za binadamu.

Waziri wa Mambo ya Nje na Ushirikiano wa Kimataifa wa Rwanda, Olivier Nduhungirehe, aliiambia BBC kuwa huwa hajibu kauli za shirika hilo kwa sababu analiona kama “shirika linalopotosha na kudharau haki za binadamu”.

Katika nyakati zilizopita, Rwanda imekuwa ikikanusha tuhuma za kukiuka haki za binadamu.

Waziri wa Usalama, Vincent Biruta, ndiye aliyewakilisha Rwanda katika mazungumzo yaliyofanyika jijini Vienna. Alisema kuwa nchi yake imejizatiti kushirikiana na nchi washirika wa Ulaya katika kutoa “suluhisho endelevu, linalozingatia sheria na linaloheshimu usalama na utu wa wahamiaji”.

Alisema kuwa Rwanda itashirikiana na nchi hizo katika “kukabiliana na ukosefu wa usawa unaoonekana duniani katika fursa za kufikia maendeleo ya kiuchumi”, akieleza kuwa hali hiyo ndiyo “chanzo kikuu cha uhamiaji usiozingatia sheria”.

Shirika hilo pia linasema kuwa mpango huo unakinzana na sheria mpya za Umoja wa Ulaya zinazohusu kuwarejesha wahamiaji katika nchi zao za asili.

Kwa mujibu wa HRW, sheria hizo zinaelekeza kuwa mikataba ya aina hiyo, kama ule unaojadiliwa kati ya Rwanda na nchi hizo tano za Ulaya, inapaswa kufanywa na nchi zinazoheshimu sheria za kimataifa zinazolinda haki za binadamu.

HRW inazitaka nchi hizo kusitisha mpango huo kwa sababu inaamini kuwa unaweza kuongeza fedha na uwezo wa Rwanda wa kukiuka haki za binadamu.

Haya yanajiri wakati ambapo, kwa mujibu wa HRW, jeshi la Rwanda linatuhumiwa kuunga mkono kundi la M23, ambalo sasa limebadilika na kuitwa FRN, linalopigana mashariki mwa Jamhuri ya Kidemokrasia ya Congo (DRC). Rwanda inakanusha tuhuma hizo.

Katika hitimisho lake, HRW ilikumbusha kuwa mwezi Januari mwaka huu, Ujerumani, Ugiriki, Denmark na Uholanzi zilikuwa zimeeleza wasiwasi kuhusu hali ya haki za binadamu nchini Rwanda, wakati nchi hiyo ilipofanyiwa tathmini na Umoja wa Mataifa (UN) kuhusu suala hilo.

Kabla ya mpango huo kuanza rasmi, wawakilishi wa nchi zinazohusika waliiambia shirika la habari la AFP kuwa kutakuwa na awamu ya majaribio, ambapo kituo kitakachoanzishwa kitapokea wahamiaji 100.

Hii ina maana kuwa kila moja ya nchi hizo tano inaweza kupeleka wahamiaji 20 nchini Rwanda.

Mwaka 2023, Mahakama Kuu ya Uingereza iliamua kuwa mpango wa nchi hiyo wa kupeleka wahamiaji nchini Rwanda ulikuwa kinyume cha sheria. Baadaye, Serikali mpya ya Uingereza ilisitisha mpango huo.

Fred Rugira

Inkuru yanditswe na: Fred Rugira

Umunyamakuru wa BWIZA.COM wanditse inkuru 4,448.