Abasirikare ba Eritrea binjiye mu majyaruguru ya Ethiopia kandi berekeza mu duce twa Tigray aho ingabo za leta zirwana n’abarwanyi bo muri ako gace, nk’uko byatangajwe n’abaturage bo mu Mujyi wa Adigrat baganiriye na BBC.
Imirwano yongeye kubura mu byumweru bibiri bishize nyuma y’amezi menshi y’umwuka mubi hagati ya Leta ya Ethiopia n’ingabo z'ishyaka rya TPLF riyobora Intara ya Tigray.
Impande zombi zishinjanya kutubahiriza amasezerano yo mu 2022 yahagaritse intambara yamaze imyaka ibiri. Leta ya Ethiopia kandi ishinja Eritrea gushyigikira TPLF, ibintu Eritrea yari yarabanje guhakana.
Mu mpera z’icyumweru gishize, abarwanyi ba TPLF bavuye mu Mujyi wa Mekele, umurwa mukuru wa Tigray, ubu ugenzurwa n’Ingabo za Ethiopia.
Abaturage ba Adigrat bavuga ko babonye imodoka nyinshi za gisirikare za Eritrea zambuka umupaka ahitwa Zalambessa, zica muri Adigrat, zerekeza i Edaga Hamus, umujyi uri hagati ya Adigrat na Mekele.
Umwe mu baturage yabwiye BBC ati: "Nabonye amakamyo agera kuri mirongo ine atwaye abasirikare. Berekezaga mu majyepfo."
Undi yavuze ko yabonye amakamyo ari hagati ya 20 na 30, amwe atwaye intwaro ziremereye, harimo n’izo kurasa indege. Hari n’andi makuru avuga ko hari abandi basirikare bagendaga n’amaguru.
Hari kandi amakuru avuga ko habonetse amakamyo agera kuri 60 atwaye abasirikare yerekeza mu misozi iri hafi ya Edaga Hamus. BBC ntirabasha kwemeza ukuri kw’aya makuru cyangwa amafoto akwirakwizwa.
Abaturage ba Wukro bavuze ko Ingabo za Ethiopia n’abarwanyi bafatanyije nazo binjiye muri uwo mujyi ku wa Gatatu nyuma y’imirwano ikaze.
Gusubirayo kw’Ingabo za Eritrea biteye impungenge abaturage benshi bo muri Tigray, bibuka ibikorwa by’urugomo izo ngabo zishinjwa gukora mu ntambara yabaye hagati ya 2020 na 2022.
Abraham Belay, umwe mu bayobozi bakuru ba Ethiopia, yashinje Eritrea kugira uruhare rutaziguye muri iyo ntambara. Yavuze ko abasirikare benshi ba Eritrea bishwe cyangwa bagafatwa mpiri.