Uwahoze ari Visi Perezida wa Kenya, Rigathi Gachagua, yashinje Perezida William Ruto ibintu bikomeye, amuhuza n’umuherwe wo muri Zimbabwe, uherutse gupfa, Wicknell Chivayo; avuga ko uyu muherwe yabikaga amafaranga ya Perezida Ruto kandi ko yari mu mugambi wo kugira uruhare mu matora rusange yo muri Kenya yo mu 2027.
Ubwo yaganiraga n’abayobozi b’amadini n’amatorero i Boston muri Leta Zunze Ubumwe za Amerika, Gachagua yavuze ko Chivayo, wapfanye n’umugore we ndetse n’abandi bantu bane mu mpanuka y’indege ya kajugujugu yabereye muri Zimbabwe ku wa Gatatu, yari afitanye imikoranire y’ubucuruzi na Perezida Ruto.
Gachagua yavuze ko Chivayo yakoreshwaga mu gutwara no kubika amafaranga ya Perezida Ruto, nta bimenyetso yatanze.
"Yari afite uwo bakoranaga ubucuruzi, umutekamutwe wo muri Zimbabwe witwa Chivayo. Uyu mugabo, kubera ko nari mwungirije bityo nkaba mbizi, bakoranaga ubucuruzi," ni ko Gachagua yavuze.
"Ni umuntu yakoreshaga mu bikorwa byo guhisha inkomoko y'amafaranga (money laundering). Yakiraga amafaranga mu madolari, uwo mugabo akaza mu ndege, akamanukira ku kibuga cy'indege cyihariye, hanyuma akajyana ayo mafaranga kuyamubikira," ni ko yakomeje avuga.
Gachagua yakomeje avuga ko Chivayo yari afite amafaranga ya Ruto arenga tiriyari 1.5 igihe yapfaga.
"Uwo mugabo afite amafaranga ye, arenga tiriyari 1.5Ksh. Uwo mugabo yapfuye, umugore we na we yapfuye, bityo ntazi aho azahera," ni ko Gachagua yakomeje avuga.
Uyu wahoze ari Visi Perezida ntiyatanze ibimenyetso bifatika byemeza ibyo yavugaga, kandi ikinyamakuru Citizen Digital kivuga ko kitashoboye kugenzura ayo makuru mu buryo bwigenga.
Gachagua yakomeje agerageza guhuza Chivayo n’umugambi uvugwa wo kwivanga mu matora rusange yo mu 2027, avuga ko uyu rwiyemezamirimo wo muri Zimbabwe yari mu bikorwa bijyanye no gutegura ikoranabuhanga rikoreshwa mu matora.
Gachagua ati: "Uwo mugabo ni inzobere mu kwiba amajwi y’amatora, kandi ni we wagize uruhare mu kwiba amajwi mu matora hirya no hino muri Afurika," .
Yongeyeho ko byari biteganyijwe ko Chivayo yari gukora nk’uhagarariye imirimo imbere mu gihugu muri gahunda y'ikoranabuhanga ry’ikigo cyo muri Koreya y’Epfo, akaba avuga ko iryo koranabuhanga ryagombaga gukoreshwa mu matora ataha muri Kenya.
Gachagua yavuze ko amabwiriza y’isoko yari yateguwe ku buryo aha amahirwe kompanyi yo muri Koreya y’Epfo itavuzwe izina, anavuga ko Chivayo yagombaga kuba umuhuza.
Ati: "Uyu mugabo yari ahagarariye abo bantu hano mu gihugu. Ni we rero yagombaga gukoresha mu kwiba amajwi. Uwo mugabo yapfuye,"
Aha na none ntiyatanze ibimenyetso bigaragaza isano iri hagati ya Chivayo n’umugambi uvugwa wo kwivanga mu matora.
Chivayo, umucuruzi ukomeye kandi ufitanye isano na politiki muri Zimbabwe, yapfuye ari kumwe n'umugore we Lucy Muteke n'abandi bantu bane nyuma y'uko kajugujugu yari ibatwaye ikoze impanuka mu gace k'icyaro ka Marondera, mu burasirazuba bwa Harare, ku wa Gatatu. Ubuyobozi bwa Zimbabwe burimo gukora iperereza ku cyateye impanuka.