Perezida wa Iran, Masoud Pezeshkian, yabwiye Donald Trump ko igihugu cye kitazigera "gicishwa bugufi cyangwa ngo gipfukamire undi," mu gihe yagaragazaga ko yiteguye ibiganiro bigamije kurangiza amakimbirane amaze hafi amezi arindwi.
Pezeshkian yatangaje ibi mu nama rusange y’Umuryango w’Abibumbye i New York, nyuma y’umunsi umwe Donald Trump atangaje ko ashobora "kurimbura" Repubulika ya Kisilamu ya Iran mu gihe nta masezerano yaba agezweho.
Yagize ati: "Uko ibihano, iterabwoba, n’ibitero birushaho kwiyongera, ni ko abaturage ba Iran barushaho gukomera no kutadohoka. Ntituzigera twemera gucishwa bugufi cyangwa ngo dupfukame."
Abahagarariye Leta Zunze Ubumwe za Amerika bavuye mu cyumba cy’inama ubwo Pezeshkian yatangiraga ijambo rye.
Kugeza ubu, Leta Zunze Ubumwe za Amerika ntiziragira icyo zitangaza ku magambo ye.
Perezida wa Iran yavuze ko igihugu cye gifunguye imiryango ku biganiro n’ubufatanye, ariko ko kitazemera ibiganiro byose byakozwe hagamijwe guhatirwa ibintu ku ngufu.
Yagaragaje ko amasezerano ayo ari yo yose agomba gutuma hakurwaho ibihano bya Amerika bibuza amato ya Iran gukoresha inzira y’amazi yo mu Muhora wa Hormuz.
Yibajije impamvu ibindi bihugu byemererwa gukoresha iyo nzira mu gihe Iran yo ibibujijwe.
Pezeshkian yanagaragaje ifoto y’umuyobozi mukuru wa Iran, Ayatollah Ali Khamenei, wishwe n’igitero cya Amerika na Israel mu mpera za Gashyantare.
Yanagaragaje amafoto y’abasivili, nk’uko Iran ibivuga, bapfuye mu bitero byibasiye ishuri ribanza i Minab na sitade ya siporo i Lamerd.
Leta Zunze Ubumwe za Amerika zahakanye ko zagabye igitero i Lamerd kandi zivuga ko zigikora iperereza ku byabereye i Minab.
Pezeshkian yongeyeho ko Iran itagamije gutunga intwaro zangiza cyane (intwaro za kirimbuzi), ariko ko itazemera kunyagwa uburenganzira bwo gukoresha ingufu za nikleyeri mu bikorwa by’amahoro.
Ku wa Kabiri, Minisitiri w’Ububanyi n’Amahanga wa Iran, Abbas Araghchi, n’intumwa ya Amerika, Steve Witkoff, bagiranye ibiganiro binyuze mu buhuza bwa Qatar.
Iran ivuga ko yongeye gushimangira ibyo isaba bijyanye no guhagarika imirwano, kurekura ubwato bwayo, no gusubizwa imitungo yafashwe na Leta Zunze Ubumwe za Amerika.