Perezida wa Argentine, Javier Milei, kuwa Gatatu yibasiye Umuryango w'Abibumbye bikomeye mu ijambo yavugiye mu Nteko Rusange yawo i New York, avuga ko "ntacyo umaze " kandi ugizwe n’ "udukoko dufite ubwibone bukabije."
Milei yatangiye yemera ko intego y’Umuryango w’Abibumbye ari ugukemura amakimbirane mu mahoro no guteza imbere ubwisanzure n’ubwubahane, avuga ko aya mahame ari "ay’icyubahiro." Ariko, yongeyeho ati: "Uyu munsi, ikibabaje ni uko igihe kigeze cyo kwemera ko, mu by’ukuri, aya masezerano mu mikorere yasheshwe."
"Mu yandi magambo, wabaye umuryango udafite icyo umaze, intego yawo iba gukomeza kubeshaho udukoko tunyunyuza dufite ubwibone bukabije, twigira nk'abayobozi bafite intego nziza,"
Mu gushimangira ibyo yavuze, yagaragaje uruhare rw'Umuryango w’Abibumbye mu mategeko yashyizweho mu gihe cy’icyorezo cya COVID-19, yise ubwoko bwa "jenoside" - ndetse no muri "gahunda y’uburinganire, ubuhezanguni bushingiye ku bidukikije, n’ubwimukira butagenzurwa."
Milei yagize ati: "Mu gihe cy'icyorezo, inzego ziri munsi y'uyu muryango zashyize imbere inyungu zazo kurusha ibimenyetso bya siyansi n'ubusugire bw'ibihugu, ziteza imbere politiki yo guheza abantu mu ngo ku ngufu ku Isi yose."
"Aho bamwe bavuga ikosa rya politiki y'ubuzima rusange, tubona kugerageza kugenzura imibereho rusange kwihishe inyuma ya siyansi. Kandi iyo leta, yahumwe amaso n'ibibazo by'ubuzima rusange, ibuza abaturage bayo uburenganzira bwo gukora, kwigishwa, no gusezera ku bapfuye, bitera abantu babarirwa muri za miriyoni impfu zishobora kwirindwa; hari ijambo ry'ibyo: jenoside."
Yashimangiye ko "igihe cyose [Umuryango w'Abibumbye] wananiwe inshingano, aho kongera kwisuzuma cyangwa gusaba imbabazi, woroheje ibintu."
Yagize ati: "Abagombaga kwemeza umutekano rusange n'uburenganzira bwa muntu bananiwe inshingano zabo. Baretse akaduruvayo, urugomo, n'iterabwoba mpuzamahanga biraganza."