Polisi y’Igihugu yatangaje ko yafashe abantu bakekwaho gucuruza inzoga z’ibyuma zakuwe ku isoko, nyuma y’amakuru yatanzwe n’abaturage.
Mu kabari ka Moon Life gaherereye mu Murenge wa Muhima, Akagari ka Nyabugogo, Polisi yahafatiye amacupa y’inzoga zitandukanye zaciwe ku isoko zirimo Konyagi 28, K-Vant 26, Bazoka 3, Kiwingu 16, Gilbey’s 6, Bond Seven 5 na Indiko Gin 16.
Umuvugizi wa Polisi mu Mujyi wa Kigali, CIP Gahonzire Wellaris, yavuze ko hafashwe umugore w’imyaka 27 uyobora ako kabari, akaba afungiye kuri Sitasiyo ya Polisi ya Muhima. Inzoga zafashwe zahise zimenwa.
Ibi bibaye nyuma y’uko hagati ya tariki ya 10 na 11 Ukwakira 2026, mu Mudugudu wa Kabeza, Akagari ka Kabuga, Umurenge wa Rusororo mu Karere ka Gasabo, Polisi yari yahafatiye ububiko bw’inzoga z’inkorano.
Muri ubwo bubiko hafatiwe amakarito y’inzoga zitandukanye zirimo Kiwingu 35, King Vodka 39, Rabiant 5 na GS Run 18, hamwe n’izindi. Nyir’ubwo bubiko yahise atoroka, ariko Polisi ivuga ko agishakishwa.
Polisi yanavuze ko ku wa 4 Ukwakira 2026, mu Karere ka Gasabo, hafashwe amakuru yerekeye umugabo w’imyaka 29 ukekwaho gucuruza inzoga zakuwe ku isoko mu iduka rye riherereye mu gace ka Mugahoromani, mu Murenge wa Rusororo. Uyu na we yahise atoroka, akaba agishakishwa.
CIP Gahonzire Wellaris yavuze ko kuba izi nzoga zigikomeje gufatanwa abacuruzi bigaragaza ko hari izikiri mu baturage.
Yasabye abaturage gukomeza gutanga amakuru ku bazicuruza mu buryo bw’ibanga, anaburira abantu kwirinda kuzinywa kuko zishobora kwangiza ubuzima.
