Kuri iki Cyumweru, itariki 11 Ukwakira 2026, ihuriro ry’ingabo zirwanira ubutegetsi bwa Kinshasa zirimo, FARDC, FDNB, FDLR na Wazalendo, zagabye igitero ku muhanda uhuza Gipimo na Rugezi, aho amakuru aturuka aha avuga ko izi ngabo zakubiswe inshuro zigatatana zerekeza Kabanju na Kimete.
Mu butumwa yanyujije kuri X, umwe mu bayobozi b’umutwe wa MRDP/Twirwaneho, Col. Fidele Rugabo, yatangaje ko ingabo za MRDP na M23 ziri guha isomo rikomeye izo ngabo zirwanira ubutegetsi.
Yanditse mu rurimi rw’Ikinyamulenge ati: “Adui Gipimo karakubitwa izakabwana, yagerageje kugaba ibitero ku baturage ba Rugezi ubu arimo kuyabangira ingata”.
Yongeyeho ko amakuru arambuye kuri iyi mirwano aza gutangazwa nyuma.
Amakuru akomeza ava muri ako gace avuga ko abaturage ba Biziba muri Minembwe barimo guhunga imidugudu yabo nyuma y’uko abacanshuro bahateye ibisasu. Ni ibitero bivugwa ko bije nyuma y’uko Umucanshuro mukuru, Erik Prince, yohereje amagana y’abacanshuro mu mugambi wo kugerageza gufata Umujyi wa Minembwe.
Kubera ko imirwano ikomeje gufata intera mu misozi miremire ya Minembwe, abacanshuro ba Prince batangiye nk'abajyanama bagiye bisanga mu ntambara zikaze. Amakuru yatangajwe n’ikinyamakuru The Times avuga ko imirwano yo mu ntangiriro z'ukwezi gushize yahitanye abacanshuro benshi bakomoka muri Colombia.
Aba bariyongera ku wundi mucanshuro wahoze mu Ngabo za Amerika, Tim Kennedy, na bagenzi be baherutse gukomerekera mu gico batezwe kuwa 17 Nzeri 2026. Undi mucanshuro ukomoka muri New Zealand, Justin Conaglen, we yarapfuye yamaze no gushyingurwa.