Uwahoze ayobora urwego rushinzwe ubutasi bwo hanze y’igihugu rw’u Budage (BND), August Hanning, arashinjwa kuba yarakuye inyandiko z’ibanga mu kigo cye yahoze ayobora, abashinzwe iperereza bakaba bari gusuzuma niba ayo makuru atarahawe ibihugu by’amahanga.
Uwahoze ari umuyobozi w’ubutasi w’u Budage, August Hanning, arashinjwa kuba yarabonye amakuru y’ibanga ayahawe n’uwahoze ari umukozi wa Federal Intelligence Service (BND) kandi akayakoresha mu bijyanye n’akazi ke bwite k’ubu “consultant”.
Ubushinjacyaha bukuru bw’u Budage ngo burimo gukora iperereza kuri uyu mukambwe w’imyaka 80 wahoze ayobora BND, ukekwaho ibyaha birimo kubona amabanga ya Leta mu buryo butemewe n’ubugambanyi bufitanye isano n’ubutasi.
Hanning ngo yakomeje kwakira inyandiko z’ibanga zivuye muri uru rwego rw’ubutasi imyaka myinshi nyuma yo kuva ku buyobozi. Uwahoze ari umuyobozi ushinzwe abakozi we akekwaho kumuha ayo makuru kandi bivugwa ko yatawe muri yombi.
Nk’uko byatangajwe n’ikinyamakuru "Süddeutsche Zeitung", muri izo nyandiko harimo raporo z’ubutasi zigenewe ‘Chancellier w’u Budage’.
Abashinzwe iperereza kandi barimo gusuzuma niba ayo makuru y’ibanga yaba yarahawe ibihugu by'amahanga.
Iperereza ngo ryatangiye nyuma y’amakuru yavumbuwe mu gihe cy’iperereza ryakorwaga ku mucuruzikazi w’Umudage, Christina Block, ndetse n’amakuru yari agenewe Umuyobozi w’u Budage yagiye ku karubanda.
Ibi birego bishingiye kuri raporo yakozwe ku bufatanye bwa "Süddeutsche Zeitung" hamwe n’ibitangazamakuru bya leta y’u Budage, WDR (Westdeutscher Rundfunk) na NDR (Norddeutscher Rundfunk).