Kuri uyu wa Kabiri, itariki ya 20 Ukwakira, ahitwa Ntoto, umurwa mukuru wa Gurupoma ya Waloa Uroba, muri Teritwari ya Walikale mu Ntara ya Kivu y’Amajyaruguru, umusirikare n’umusivili bishwe n’amasasu ubwo imitwe ibiri y’Ingabo za Repubulika ya Demokarasi ya Congo (FARDC) yasubiranagamo. Amakuru agera kuri ACTUALITE.CD avuga ko undi musirikare n’umusivili na bo bakomeretse bikabije.
Umuyobozi wa Gurupoma ya Waloa Uroba, Barthélemy Mulengezi Luc, yasobanuye ko ibyabaye byabaye igihe itsinda ry'abasirikare bari baturutse ku rugamba bagerageza kwambuka Ntoto. Abasirikare bo mu mutwe wa Military Police (PM) bagerageje kubahagarika, bituma habaho guterana amagambo hagati y’imitwe yombi.
Ibintu byaje gufata intera, hazamo kurasana. Uku kurasana kwahitanye abantu babiri abandi babiri barakomereka. Abakomeretse bajyanwe ku kigo nderabuzima cyaho kugira ngo bavurwe.
Aya makuru kandi yemejwe na Major Dieudonné Kasereka, Umuvugizi w’Akarere ka 34 ka Gisirikare ka FARDC. Yijeje ko iki kibazo gikomeje gukurikiranwa, mu gihe agaragaza ko hafashwe ingamba ku basirikare bagize uruhare muri iyo mirwano yahitanye abantu.
Ibi bibaye mu gihe muri iki gice hakomeje kugaragara ibibazo by’umutekano mucye ndetse n’ibikorwa bya gisirikare ku mirongo y’imbere y’urugamba muri Walikale.
Byongeye kwerekana kandi ingaruka amakimbirane hagati y’imitwe ya gisirikare ashobora kugira ku mutekano w’abaturage b’abasivili, cyane cyane mu turere twegereye ibirindiro byabo.