Abashinzwe umutekano babiri bishwe, abandi benshi barakomereka mu gitero cya misile z'Aba-houthi cyibasiye ingoro ya Perezida wa Yemen, i Aden mu majyepfo y’iki gihugu.
Minisitiri w’Itangazamakuru wa Yemen, Moammar al-Eryani, yatangaje ko misile eshanu za ballistique zarashwe ku ngoro ya al-Maashiq, ariko Minisitiri w’Intebe n’abandi bari kumwe na we ntibagire icyo baba.
Itangazamakuru rigenzurwa n’inyeshyamba z'Aba-houthi ryatangaje ko igitero cyibasiye ibirindiro by’ibikorwa bya gisirikare birimo abasirikare bo muri Arabie Saoudite, ndetse n’ahabikwa intwaro.
Aba-houthi ni umutwe witwaje intwaro ushyigikiwe na Iran, umaze imyaka myinshi uhanganye n’ubutegetsi bwa Yemen bwemewe n’amahanga, bushyigikiwe n’ihuriro ry’ibihugu riyobowe na Arabie Saoudite.
Iki gitero kibaye mu gihe intambara hagati y’impande zombi ikomeje gufata indi ntera.