Abapolisi umunani b’abagore bo mu gipolisi cyo mu ntara ya Sichuan mu Bushinwa bakoze ibitangaza mu irushanwa mpuzamahanga rya UAE SWAT Challenge 2026 ryabereye i Dubai, muri Leta Zunze Ubumwe z’Abarabu.
Aba bapolisi bitabiriye icyiciro cyiswe Officer Rescue, gisaba abitabiriye kugaragaza umuvuduko, ubuhanga mu kurasa, imbaraga z’umubiri no gukorera hamwe.
Amakuru yatangajwe avuga ko ikipe y’aba bagore yarangije inzira y’irushanwa mu minota itatu, ikarusha hafi amasegonda 16 ikipe yari ihagarariye Polisi ya Orlando yo muri Leta ya Florida, muri Leta Zunze Ubumwe za Amerika.
Imwe mu mbogamizi zikomeye muri iri rushanwa yari iyo guterura no gutwara ipine ipima ibiro 120, batemerewe kuyikurura hasi, kuyizungurutsa cyangwa kuyijugunya. Kuyikorera gusa.
Amashusho y’iri rushanwa yagaragaje aba bapolisi batwara iyo pine bahuje imbaraga n’ubuhanga, ibintu byashimangiye akamaro ko gukorera hamwe mu kazi gasaba imbaraga nyinshi.
Iri rushanwa ryitabiriwe n’amakipe 109 y’abapolisi bashinzwe ibikorwa bidasanzwe, aturutse mu bihugu 48.
Mu byiciro by’abagore, ikipe ya Sichuan yarangije iri rushanwa iri ku mwanya wa kabiri mu rutonde rusange rw’abagore.