Kuri uyu wa Kabiri, itariki ya 13 Ukwakira 2026, ihuriro ry'ingabo zirwanira ubutegetsi bwa Kinshasa, zifashishije inyeshyamba za FDLR ku mirongo y’imbere hamwe n’abacanshuro b’abanyamahanga, ryakajije ibitero ku bice bitandukanye birimo ibituwe cyane.
Ibi bitero biri gutuma abaturage benshi bahunga ndetse bikarushaho kuzahaza imibereho y’abaturage nk'uko bigaragara mu itangazo ryashyizwe ahagaragara na AFC/M23.
Iri tangazo rivuga ko saa kumi n’imwe n’igice za mu gitondo (5:30 a.m.), izi ngabo zirwanira ubutegetsi bwa Kinshasa zatangiye kurasa ibisasu ku gace ka Rugezi n’inkengero zako, mu karere ka Minembwe.
Ahagana saa kumi n’ebyiri n’igice za mu gitondo (6:30 a.m.), izo ngabo zagabye ibitero ku duce dutuwe cyane twa Nabumbu, Mitimbili no mu nkengero zaho, mu Murenge wa Kaziba, muri Teritwari ya Walungu.
Naho ku isaha ya saa kumi n’ebyiri na mirongo ine n’itanu za mu gitondo (6:45 a.m.) nk'uko iri tangazo rikomeza rivuga, hagabwe ibitero icyarimwe ku duce twa Kasovu na Kumadepo, muri Teritwari ya Masisi, ndetse no kuri Rumbishi, muri Teritwari ya Kalehe.
Itangazo risoza rivuga ko kubera kwiyongera kw’ibi bitero ku bice bitandukanye, ingabo z'ihuriro rishya riyobowe na Joseph Kabila kuri ubu, Front Pour la Refondation de la Nation (FRN) ziri mu myiteguro yo kurinda abaturage no guhangana n’ibyo bitero bikomeje
Inkuru yanditswe na: Denis Nsengiyumva
Umunyamakuru wa BWIZA.COM wanditse inkuru 11,310.