Bwiza

Afurika y'Epfo: Abagore hafi 600 bamaze kwicwa mu mezi 3

Amakuru•
Denis Nsengiyumva
By Denis Nsengiyumva
•Kuwa Gatanu, 20 Ugushyingo 2026 saa 14:45
Afurika y'Epfo: Abagore hafi 600 bamaze kwicwa mu mezi 3

Abagore hafi 600 bishwe muri Afurika y'Epfo hagati ya Nyakanga na Nzeri uyu mwaka, nk'uko imibare mishya y'ibyaha bibera muri icyo gihugu ibigaragaza.
‎
Iyi mibare irimo abagore 13 imirambo yabo yambaye ubusa n'ibikomere yakuwe mu bice bihuriramo abantu benshi muri Johannesburg no hafi yaho nk'uko inkuru dukesha BBC ivuga.
‎
Ubwicanyi bwateje uburakari mu gihugu, maze polisi ihura n'igitutu cyo gushaka ababikoze, mu gihugu gifite igipimo cyo hejuru cy'ihohoterwa rishingiye ku gitsina n'ubwicanyi ku Isi.
‎
Mu bwicanyi buheruka gukorwa, abagore batanu n'umwana muto barasiwe mu Ntara ya Free State mu ntangiriro z'iki cyumweru. Imibare mishya y'ibyaha yasohotse kuri uyu wa Gatanu, yagaragaje ko abagore 581 bishwe muri icyo gihugu hagati ya Nyakanga na Nzeri, harimo 131 mu Ntara ya Gauteng irimo Johannesburg.
‎
Iyi mibare yagaragaje ko umubare w'ubwicanyi wagabanutse gato. Polisi yatangaje ubwicanyi 5.590, yongeraho ko bwagabanyutseho 204 ugereranyije n'ubwabaye mu gihe nk'icyo umwaka ushize. Imibare ariko iracyagera ku mpuzandengo y'ubwicanyi bugera kuri 60 ku munsi.
‎
Ntabwo biramenyekana neza niba umubare w'abagore bishwe wariyongereye cyangwa waragabanutse kuko polisi yari yarahagaritse gutanga iyi mibare vuba aha bitewe n'ibyo bavuze ko ari "ibintu bidasanzwe" mu mibare.
‎
Iyi mibare mishya y'abagore bishwe yateje ubwoba muri Afurika y'Epfo, aho Minisitiri w'agateganyo ushinzwe Polisi, Firoz Cachalia, yavuze ko hakenewe "imbaraga zikomeye mu gukumira ... ihohoterwa" rikorerwa abagore n'abana.
‎
Nk'uko polisi yo mu Ntara ya Free State, mu majyepfo ya Johannesburg ibivuga, abagabo batatu bitwikiriye mu maso barashe ku muryango wo mu Mujyi wa Botshabelo mu ijoro ryo kuwa Gatatu.

Denis Nsengiyumva

Inkuru yanditswe na: Denis Nsengiyumva

Umunyamakuru wa BWIZA.COM wanditse inkuru 11,310.