Ikipe ya FC Barcelona igiye gutangaza ku mugaragaro amasezerano mashya y’umukinnyi wayo Raphinha, azayigumamo kugeza ku wa 30 Kamena 2030.
Amakuru yatangajwe ku wa 5 Ugushyingo 2026 avuga ko impande zombi zari zamaze gusinya aya masezerano mu ntangiriro z’Ukwakira, nyuma yo kumvikana ku ngingo zose.
Aya masezerano mashya azongeraho imyaka ibiri ku yo yari asanzwe afite, yagombaga kurangira mu 2028.
Umuyobozi ushinzwe ibijyanye n’imikino muri Barcelona, Deco, yari yatangaje ko bumvikanye ku kongera amasezerano ya Raphinha mu nama rusange y’iyi kipe yabaye hagati muri Nzeri 2026.
Raphinha w’imyaka 29, akaba na kapiteni wa Barcelona, ari mu bakinnyi ngenderwaho mu ikipe itozwa na Hansi Flick. Uyu munya-Brésil yitwaye neza muri uyu mwaka w’imikino, haba muri La Liga no muri UEFA Champions League.
Raphinha yageze muri Barcelona mu 2022 avuye muri Leeds United yo mu Bwongereza. Kuva icyo gihe, yagiye yiyubaka kugeza ubwo abaye umwe mu bakinnyi b’ingenzi muri iyi kipe yo muri Espagne.