Minisiteri y'Ubuzima yatangaje ko muri iyi minsi mu gihugu hari ubwiyongere bw'indwara zifitanye isano n'ihindagurika ry'ikirere, zirimo na COVID-19.
Byatangajwe na Minisitiri w'Ubuzima, Dr Sabin Nsanzimana, mu butumwa yanyujije ku rubuga rwe rwa X.
Yagize ati: "Muraho! Muri iyi minsi tuva mu itumba tugana mu cyi; hari ubwiyongere bw’ indwara zifitanye isano n’ ihinduka ry’ ikirere."
Umwanya w'Iyamamaza ry'Ubucuruzi - BWIZA ADS
Kwamamaza hano: isaackamis@gmail.com | +250 788 000 000
Minisitiri w'Ubuzima agaruka ku bicurane, yavuze ko mu bicurane biri kugaragara mu gihugu harimo ibiterwa "na virus ya influenza na Covid", mbere yo gusaba Abaturarwanda kwirinda kwanduzanya no kugira isuku.
Ikigo cy'Igihugu gishinzwe Ubuzima (RBC), kivuga ko mu bipimo byafashwe bigera ku bihumbi 16, byagaragaye ko abantu bangana na 0,7% by’abo banduye Covid-19, ndetse ubu bakaba bari kwitabwaho.
Umuyobozi w'Iki kigo, Prof. Claude Mambo Muvunyi, yavuze ko u Rwanda rwiteguye gukomeza guhangana na COVID-19 ku buryo bidakwiye gukura umutima Abaturarwanda.
Ati “Nta kintu cyatera ubwoba gihari, kuko ababonetse ntabwo barembye, ni ibintu bisanzwe by’ibicurane ariko na Covid-19 bari munsi ya 1%. Mu mpagararizi twari twafashe, twari twafashe izigera ku bihumbi 16000.”
Usibye COVID-19, MINISANTE yanavuze ko mu gihugu hari kugaragara ubwiyongere bwa Malariya, isaba ubufatanye mu kurwanya imibu no kwisuzumisha ku gihe.