Itsinda ry’abunzi b'Umuryango wa Afurika Yunze ubumwe, kuri uyu wa Mbere, itariki 5 Ukwakira 2026, zakiriwe n’ubuyobozi bukuru bwa AFC / M23 i Goma, mu nama yo mu rwego rwo hejuru yahariwe inzira y’amahoro mu burasirazuba bwa DRC.
Iri tsinda ry'abahoze ari abakuru b'ibihugu rigizwe na Uhuru Kenyatta, wahoze ari Perezida wa Kenya, Mokgweetsi Masisi, wahoze ari Perezida wa Botswana, na Sahle-Work Zewde, wahoze ari Perezida wa Ethiopia.
Hari abandi batabashije kuboneka barimo Catherine Samba Panza, wahoze ari Perezida wa Centrafrica, utabonetse kubera impamvu z'uburwayi, hamwe na Obasanjo, wabaye Perezida wa Nigeria, wagiye mu butumwa bwihutirwa ku bibazo bya Eritrea na Ethiopia.
Aba bahoze ari abakuru b'ibihugu bazaganira n'ubuyobozi bwa politiki n'ubwa gisirikare bw'ihuriro rirwanya ubutegetsi muri Repubulika ya Demokarasi ya Congo, rya AFC/M23.
Uko ari batanu bagize itsinda ry'ubuhuza ku bibazo bya Repubulika ya Demokarasi ya Congo, ryashyizweho na Afurika Yunze Ubumwe rikaba riyobowe na Perezida Faure Gnassingbé, wa Togo.