Ingabo za nyuma za Amerika zari ziri muri Irak zirahava kuri uyu wa Gatatu

Kuri uyu wa Gatatu, Ingabo za Leta Zunze Ubumwe za Amerika zirava ku birindiro byazo byari bisigaye muri Irak, zikaba zisize impungenge z'uko bishobora gusiga icyuho mu mutekano, bigaha imbaraga imitwe y’inyeshyamba z'Aba-Shiite zishyigikiwe na Iran, ndetse bigaha amahirwe umutwe wa Islamic State yo kongera kwisuganya.
‎
Iki gikorwa cyo kuva muri icyo gihugu, cyishimiwe nk’intsinzi na Tehran n’abafatanyabikorwa, cyemeranyijweho mu 2024 ku butegetsi bwa Perezida Joe Biden, ariko gishyirwa mu bikorwa n’ubutegetsi bwa Donald Trump mu gihe na bwo bwari bugifite amakimbirane na Iran.
‎
Ibi bibaye nyuma y’imyaka 23 ingabo ziyobowe na Amerika zikuye Saddam Hussein ku butegetsi, ibintu byakurikiwe n’akavuyo n’umutekano muke, bigera naho havuka umutwe wa Islamic State.
‎
Nubwo abaturage ba Irak benshi bashyigikiye ko Ingabo za Amerika zigenda, hari abafite impungenge ko ingabo z’igihugu, zahawe amahugurwa n'inkunga bya Amerika, zitari zakwibasha gucunga umutekano w’igihugu, aho abasirikare ba Amerika bagera ku 4,500 baguye mu ntambara yamaze imyaka irenga 20.
‎
Jassim al-Bahadli, umusesenguzi wo muri Irak akaba n’umujyanama w’inzego z’umutekano, yagize ati: "Isomo dukura mu myaka makumyabiri ishize ni uko ibyuho mu by'umutekano bishobora kuba biteye akaga gakomeye."
‎
Nyuma yo gutera Irak mu 2003 nk'uko inkuru dukesha Reuters ikomeza ivuga, Amerika yafashe icyo gihugu, ishyiraho guverinoma iyobowe n’Abashiiite (Shi'ites), ndetse irwana n’inyeshyamba mu gihe cy’imyaka myinshi, ihereye ku zari zishyigikiye Saddam, hanyuma hakurikiraho umutwe wa al-Qaeda, mu gihe intambara y’imbere mu gihugu ishingiye ku madini n’amoko yasenyaga Irak, mbere y’uko Ingabo za Amerika zihava mu mpera za 2011.
‎
Zasubiyeyo nyuma y’imyaka itageze kuri itatu kugira ngo zifashe Ingabo za Irak gutsinda umutwe w’intagondwa z'Aba-Sunni wa Islamic State, wateje ubwoba bwinshi amiliyoni y’abantu, mu ntambara ikomeye yabaye hagati ya 2014 na 2017.