Imirwano ikaze yavuzwe kuva mu gitondo cyo kuri uyu wa Kabiri ahitwa Kasake, Katoyi centre no muri Ngululu hagati y’inyeshyamba za AFC/M23 n’inyeshyamba za Wazalendo zifatanya na FARDC. Kasake ni agace gaherereye muri Teritwari ya Masisi kandi ntaho ihuriye n'umujyi wa Sake, uri mu birometero 27 uvuye i Goma.
Amakuru akomezwa atangazwa n’uruhande rushyigikiye leta avuga ko muri iki gitondo cyo kuri uyu wa kabiri, inyeshyamba za M23 zafashe abagabo urubyiruko, abana, ndetse n’abasaza (amakuru udashobora kugenzura) i Ngungu maze babajyana i Kasake na Shovu, ku murongo w’imbere w’urugamba.
Umwe mu bavuga rikijyana muri Ngungu yagize ati: “Uku gukoresha abasivili badafite imyitozo ya gisirikare iyo ari yo yose nk’ingabo z’abantu (human shields) mu ntambara ni icyaha cy’intambara no kurenga cyane amategeko mpuzamahanga arengera ikiremwamuntu “
Uyu akomeza ahamagarira abasivili guhunga no kwanga M23, itsinda avuga ko rikorera inyungu z’u Rwanda nk’uko inkuru dukesha Tazama RDC ivuga.
Ihuriro rya AFC/M23 ryakunze guhakana ko ryinjiza abantu mu gisirikare ku ngufu, by’umwihariko abana batujuje imyaka y’ubukure, ndetse kenshi rikaba ryaragiye ryerekana mu mashusho uko rishaka abarwanyi ndetse rigashyira ku mugaragaro amakuru iyo basoje imyitozo bitandukanye n’ibivugwa ko rijyana abantu batatojwe ku rugamba.