Ntabwo yigeze atangaza ku mugaragaro ko ateganya kuba umukandida, nyamara Patrice Motsepe, Perezida wa CAF, arahabwa amahirwe cyane mu matora ya perezida ataha muri Afurika y'Epfo, nk'uko ubushakashatsi buherutse gukorwa bubigaragaza.
Uyu muherwe, nyiri ikipe y'umupira w'amaguru ya Mamelodi Sundowns yo muri Pretoria, yatwaye igikombe cya Afurika cy’amakipe giheruka, ari imbere ya perezida uriho ubu Cyril Ramaphosa mu bijyanye no gukundwa, nk'uko aya matora yakozwe na News24 n'ikigo cya SABI abitangaza. Ndetse no mu batoye bo muri ANC, niwe bashyira imbere.
Muri Afurika y'Epfo, benshi basanzwe bamubona nka perezida. Patrice Motsepe, perezida w’ishyirahamwe ry’umupira w’amaguru muri Afurika (CAF), agaragaza urwego runaka rw’intsinzi, mbere na mbere mu bucuruzi: ni umwe mu bantu bakize ku mugabane wa Afurika. Icya kabiri, muri siporo: ikipe ye y’umupira w’amaguru, Mamelodi Sundown, yegukanye igikombe cya Afurika inshuro ebyiri.
Mu gihe umuherwe avuga ko adafite intego zo kujya muri politiki, manda ye yo kuba umuyobozi wa CAF izarangira mu 2029, umwaka w’amatora ya perezida muri Afurika y’Epfo. Ikinyamakuru News24 n'Ikigo cya SABI bamugerageje mu matora ya ‘sondage’ baheruka gutegura, kandi ibisubizo nta gushidikanya: Perezida wa CAF ni we muntu rukumbi uzwi cyane mu gihugu watanzweho ibitekerezo byiza kuruta ibitekerezo bibi.
Akeneye gusa gushyigikirwa n’abatora mu ishyaka ANC, ishyaka yegereye cyane, akazamuka ku mwanya w’imbere kugira ngo azasimbure Cyril Ramaphosa ku buyobozi bw’ishyaka, imbere ya Visi Perezida uriho ubu, Paul Mashatile n’umunyamabanga mukuru Fikile Mbalula.
Bamwe mu basesenguzi ariko bagaragaza ko, nubwo ashyigikiwe cyane, akomeje kutagira ubunararibonye muri politiki kandi ashobora kugongana n’abamurwanya imbere mu ishyaka rya ANC aramutse yifuje kuyobora igihugu.