Igisirikare cya Repubulika ya Demokarasi ya Congo (FARDC) n’abafatanyabikorwa bacyo barimo Igisirikare cy’u Burundi na FDLR baravugwaho kugaba ibitero byiganjemo ibitero bya bombe na drones mu bice bituwe cyane i Minembwe birimo nka Rugezi.
Itangazo ryashyizwe ahagaragara na FRN rivuga ko “mu ijoro ryo ku wa Kane, itariki 15 Ukwakira, kugeza kuri uyu wa Gatanu, itariki ya 16 Ukwakira 2026, ihuriro ry’ingabo zirwanira ubutegetsi bwa Kinshasa, zirimo FARDC, FDLR, imitwe yitwara gisirikare ya Wazalendo, abacanshuro b’abanyamahanga, n’Ingabo z’u Burundi, bakomeje ibitero byabo bya gisirikare, byaranzwe no gutera ibisasu bya bombe hakoreshejwe intwaro za rutura ndetse n’ibitero by’indege zitagira abadereva, harimo na drones za kamikaze”.
Nk’uko iri tangazo rikomeza rivuga, “Kuva ku isaha ya saa 1h00 zo ku wa Gatanu, itariki ya 16 Ukwakira 2026, ihuriro ry’ingabo zirwanira ubutegetsi bwa Kinshasa zagabye igitero gikomeye kuri Rugezi no mu nkengero zaho mu karere ka Minembwe, hakoreshejwe imbunda nini na drone za kamikaze”.
Kuri uyu wa Gatanu, saa mbiri za mu gitondo, izo ngabo zarashe ibisasu bya bombe zikoresheje imbunda za mortier 82mm ndetse n’imbunda nini zizwi nka “canons sans recul SPG-9” zerekeza Buhimba na Mahanga, uduce tubiri dutuwe cyane muri Teritwari ya Masisi.
Mu guhangana n’ubwiyongere bw’imirwano, FRN ivuga ko ingabo zayo zikomeje ibikorwa byo kurengera abaturage b’abasivili kinyamwuga, disipuline ndetse n’ubushake.