Minisitiri w’Ingabo z’u Rwanda, Juvenal Marizamunda, ari mu Bubiligi aho yitabiriye inama mpuzamahanga yiga ku mutekano n’ubwirinzi, izwi nka Schuman Forum on Defence and Security 2026.
Iyi nama iri kubera i Bruxelles, ihuriza hamwe abayobozi n’impuguke mu by’umutekano n’ingabo baturutse mu bihugu bitandukanye ku Isi, ikaba yitabiriwe n’ibihugu bisaga 80 n’imiryango mpuzamahanga 10.
Nk’uko Minisiteri y’Ingabo z’u Rwanda yabitangaje, iyi nama ifite insanganyamatsiko igira iti: “Ubufatanye bwizewe mu by’umutekano n’ubwirinzi mu bihe bigaragaza impungenge z’umutekano muke.”
Intego yayo ni ukungurana ibitekerezo ku bibazo byugarije umutekano mpuzamahanga no kurebera hamwe uburyo ibihugu n’imiryango mpuzamahanga byarushaho gukorana mu guhangana na byo.
Minisitiri Marizamunda yitabiriye iyi nama ari kumwe na Ambasaderi w’u Rwanda mu Bubiligi, Igor César, na Brig Gen Patrick Karuretwa, Umuvugizi w’Ingabo z’u Rwanda (RDF).
Mu biganiro byabereye muri iyi nama, Minisitiri Marizamunda yagaragaje uko u Rwanda ruhagaze ku bibazo bitandukanye by’umutekano, by’umwihariko ubufatanye mu bya gisirikare, kurwanya iterabwoba no kubungabunga amahoro.
Yanagiranye ibiganiro na Patricia Llombart, Umuyobozi Mukuru ushinzwe Afurika mu rwego rw’Umuryango w’Ubumwe bw’u Burayi rushinzwe ibikorwa by’ububanyi n’amahanga.
Nyuma y’ibi biganiro, Llombart yatangaje ko yagiranye na Minisitiri Marizamunda ibiganiro by’ingirakamaro, ashimangira ko amahoro n’umutekano mu Karere k’Ibiyaga Bigari, muri Afurika no ku Isi muri rusange bifite akamaro gakomeye.
Yongeyeho ko Umuryango w’Ubumwe bw’u Burayi uzakomeza gushyigikira ibikorwa bigamije guteza imbere amahoro n’umutekano.


