"Mu gihe cyose ..... Kagame atarava ku butegetsi, Tshisekedi na we ntazigera ava ku butegetsi," ibi byatangajwe na Minisitiri José Mpanda wo muri Repubulika ya Demokarasi ya Congo.
José Mpanda, Minisitiri ushinzwe Iposita, Itumanaho n’Ikoranabuhanga rishya mu Itumanaho (PT-NTIC), yahuje kuguma ku butegetsi kwa Félix Tshisekedi no kuva ku butegetsi kwa Perezida w’u Rwanda, Paul Kagame.
"Mu gihe cyose Kagame (yabanje kuvuga akoresheje amagambo asebanya) atarava ku butegetsi, Tshisekedi na we ntazigera ava ku butegetsi," ibi yabivuze yiyita umwe mu "bantu ba hafi" b’Umukuru w’Igihugu cya Repubulika ya Demokarasi ya Congo.
Nk’uko abivuga, inshingano Félix Tshisekedi afitiye Repubulika "ntizirangira," kandi ngo ni inshingano z’abamushyigikiye, cyane cyane, Abakirisitu, kumushyigikira "nk’imbago yishingikiriza kugira ngo igihugu kibanze kugira "imisingi ikomeye" mbere y’uko ava ku butegetsi.
Avuga ko ari we wa mbere wagaragaje ko Perezida afite "inshingano" agomba gusohoza aho kuba afite gusa "igihe ntarengwa cyo kuyobora" (mandat).
Uyu minisitiri yizera ko hari n’abandi bagiye bahuje na we ibitekerezo kuri iyo ngingo, nubwo mu ntangiriro hari abamunenze.
Ibi byatangajwe mu gihe hakomeje impaka ku bijyanye n’ivugurura ry'Itegeko Nshinga rishobora gukorwa, ndetse no mu gihe abatavuga rumwe na leta basaba ko Félix Tshisekedi yazava ku butegetsi igihe manda ye ya kabiri, ari yo ya nyuma, izaba irangiye mu mwaka wa 2028.
Minisitiri Mpanda na Perezida Tshisekedi/Ifoto:Internet
Inkuru yanditswe na: Denis Nsengiyumva
Umunyamakuru wa BWIZA.COM wanditse inkuru 11,310.