Tim Kennedy, wahoze ari umukinnyi w’imikino yo kurwana muri UFC akanaba uwahoze ari umusirikare w’ingabo zidasanzwe za Leta Zunze Ubumwe za Amerika, bivugwa ko yarasiwe muri Repubulika Iharanira Demokarasi ya Congo (RDC), mu gitero cyagabwe ku itsinda ry’abantu batatu ku wa 17 Nzeri 2026.
Amakuru yatangajwe n’ibitangazamakuru bitandukanye avuga ko Kennedy yarashwe amasasu menshi, harimo atatu yamufashe mu kuguru, ubwo we n'abandi bantu babiri bagwaga mu gico bari batezwe.
Nyuma yo kuraswa, bivugwa ko Kennedy yamaze amasaha hafi umunani atarabona ubufasha bwo kumuvana aho yari yakomerekeye. Yaje kwimurirwa muri Leta Zunze Ubumwe za Amerika kugira ngo avurwe, aho amakuru avuga ko ubu ubuzima bwe butameze nabi.
Kennedy ni umwe mu bantu bazwi mu mikino yo kurwana muri Leta Zunze Ubumwe za Amerika. Yigeze gukina muri UFC, irushanwa rikomeye ku rwego mpuzamahanga rihuza abakinnyi b’imikino ivanze yo kurwana, izwi nka Mixed Martial Arts.
Mbere yo kuba umukinnyi w’imikino yo kurwana, Kennedy yari umusirikare mu ngabo zidasanzwe za Amerika, zizwi nka Green Berets, aho yari mudahusha. Yakoze ibikorwa bya gisirikare muri Iraq na Afghanistan.
Amakuru avuga ko ubwo Kennedy yaraswaga yari kumwe na Justin Conaglen, wahoze ari umusirikare wo mu ngabo zidasanzwe za Nouvelle-Zélande hamwe n’undi muntu utaramenyekana.
Conaglen yapfiriye muri icyo gitero cyo ku wa 17 Nzeri, ndetse n’ibisobanuro birambuye ku cyabaye, ntibiratangazwa n’inzego zibishinzwe ku buryo bwigenga.
Hari kandi amakuru ataremezwa avuga ko Kennedy n’abo bari kumwe bashobora kuba bari abarwanyi mu mutwe w'abacanshuro w'Umunyamerika Erik Prince usanzwe afasha Leta ya RDC mu ntambara irwanamo n'umutwe wa AFC/M23.
Andi makuru ataremezwa avuga ko iryo tsinda rishobora kuba ryarahuye n’abagize Africa Corps, umutwe w’ingabo z’u Burusiya ukorera mu bihugu bitandukanye bya Afurika.
Bariya bagabo barasiwe muri RDC mu gihe uburasirazuba bw'iki gihugu bukomeje kurangwa n’imirwano n’umutekano muke, aho ingabo za Leta, FARDC, n’imitwe itandukanye yitwaje intwaro bakomeje guhangana mu bice bitandukanye by’Uburasirazuba bw’igihugu.
Kuba mu bantu bari muri iryo tsinda harimo uwahoze ari umusirikare w’ingabo zidasanzwe za Amerika ndetse n’uwahoze muri NZSAS byatumye amakuru y’iki gitero akomeza kwitabwaho, cyane cyane kubera ibivugwa ku bikorwa by’abikorera ku giti cyabo bakora mu rwego rw’umutekano muri RDC.