Abanyamahanga babiri basanzwe bapfuye mu nyubako y’amacumbi iri hafi ya Chania Avenue i Kilimani, Nairobi, bafite ibikomere by’amasasu mu mutwe. Polisi yavuze ko bemera ko bombi, umugabo w’Umushinwa n’umugore wo muri Vietnam, bapfuye bazize kwiyahura.
Abapfuye bamenyekanye nka Nguyen Hong Ngoc, umugore wo muri Vietnam, na Xu Zhiyu, umugabo ukomoka mu Bushinwa.
Bombi babanaga nk'umugabo n'umugore mu nyubako ya ‘apartment’ aho imirambo yabo yasanzwe mu gitondo cyo kuri uyu wa Kabiri ushize nk'uko tubikesha urubuga The Star rwo muri Kenya.
Impamvu ntabwo yahise imenyekana. Umuyobozi wa polisi mu Mujyi wa Nairobi, Issa Mohamud, yatangaje ko basanze agapapuro mu nzu kanditswe mbere yo kwiyahura, kakaba karimo gusesengurwa mu rwego rw’iperereza kuri iki kibazo ngo harebwe ko ari bo bakanditse koko.
Polisi ivuga ko bikekwa ko umwe mu bapfuye yabanje kurasa mugenzi we akamwica, mbere yo kwitunga imbunda agakurura imbarutso akimena umutwe.
Nk’uko abapolisi babitangaza, umuyobozi muri iyo ‘apartment’ yatangaje ko yumvise urusaku rw’amasasu mu nzu A506 ahagana mu ma saa yine z’igitondo.
Iyi nzu ngo yari ifungiwe imbere kandi bidashoboka kwinjiramo ako kanya, biba ngombwa ko hitabazwa abapolisi.
Ubuyobozi bw'iyi nyubako y’amacumbi bwakinguye inzu hakoreshejwe urundi rufunguzo.
Imbere mu nzu, abapolisi bahasanze imirambo yombi, bicaye begeranye kuri matelas mu cyumba, bafite ibikomere bikekwa ko ari iby’amasasu mu mutwe.