Abashakanye ntibakwiye gushyiranaho igitutu cyo kumara igihe runaka mu mibonano mpuzabitsina, kuko igihe imara gitandukana bitewe n’abantu, uko bamerewe n’ibyo buri wese akunda. Urubuga rwa Durex rugaragaza ko icy’ingenzi atari igihe igikorwa kimara, ahubwo ari uko abafatanyije banyurwa kandi bakumva bafitanye ubusabane.
Ubushakashatsi bwashyizwe ahagaragara mu 2005 mu kinyamakuru The Journal of Sexual Medicine bugaragaza ko impuzandengo y'iminota 5 kuri 4 uhereye igihe igitsina cyinjiriye mu kindi. Icyakora, iyi mibare ntigaragaza igihe cyose abantu bamara mu bikorwa byose bigize imibonano mpuzabitsina.
Durex isobanura ko imibonano mpuzabitsina idafite igihe ntarengwa abantu bose bagomba kumara. Hari abahitamo kumarana igihe kinini mu gusomana, gukoranaho no gutegurana, mu gihe abandi bashobora guhitamo igikorwa kigufi. Icy’ingenzi ni uko bombi babyumvikanaho kandi bakanyurwa.
Hari ibintu bitandukanye bishobora gutuma igihe imibonano imara gihinduka. Muri byo harimo imyaka, ubuzima bw’umubiri, imikorere y’imyororokere, umunaniro ndetse n’amaganya cyangwa igitutu umuntu aba afite.
Ku bantu bamwe, guhangayikishwa no gushaka kugaragaza ko bashoboye bishobora kubangamira ubusabane no kunyurwa. Ni yo mpamvu ari byiza kutigereranya n’abandi, ahubwo buri wese akita ku byo we na mugenzi we bakeneye.
Durex itanga inama zitandukanye zishobora gufasha abashakanye kunoza ubuzima bwabo bw’imibonano mpuzabitsina.
1. Gufata umwanya wo gutegurana
Gusomana, guhobera no gukoranaho mu bwumvikane bishobora kongera ubusabane no gufasha umubiri kwitegura imibonano. Ibi bishobora no kugabanya ububabare buterwa no kubura ububobere.
2. Kwita ku buzima bw’umubiri
Imyitozo ngororamubiri, kuruhuka bihagije no kwita ku ndyo bishobora gufasha ubuzima rusange, harimo n’ubuzima bw’imyororokere.
3. Kuganira hagati y’abashakanye
Kuganira ku byo buri wese akunda, ibyo atishimira n’ibimubangamiye bishobora kugabanya igitutu no kongera kunyurwa. Kuganira bigomba gushingira ku kubahana no kwemera ko buri wese afite uburenganzira bwo kuvuga ibyo yumva.
4. Kwitoza kugenzura imikaya yo mu nda yo hasi
Imyitozo ya Kegel ifasha gukomeza imikaya yo mu nda yo hasi, ishobora kugira uruhare mu mikorere y’imyororokere. Abantu bafite ikibazo cyo gusohora vuba bashobora kuganira n’umuganga ku myitozo cyangwa ubundi buryo bwabafasha.
5. Kwita ku buzima bwo mu mutwe
Amaganya, kwiheba n’igitutu cyo gushaka gukora neza bishobora kugira ingaruka ku bushake no kunyurwa. Iyo ibyo bibaye ikibazo gikomeza, kuganira n’umuganga cyangwa inzobere mu buzima bw’imibonano mpuzabitsina bishobora gufasha.
Igihe imibonano mpuzabitsina imara ntigikwiye kuba igipimo cyonyine cyerekana ko yagenze neza. Icy’ingenzi ni ukwemeranya, kubahana, kwita ku mutekano no kunyurwa kw’abafatanyije.
Abashakanye bafite ikibazo gihoraho cyo gusohora vuba, kubabara cyangwa kutanyurwa bashobora kugisha inama inzobere mu buzima kugira ngo bamenye impamvu n’uburyo bukwiye bwo kugikemura.