U Busuwisi burimo kuvugurura ibiganiro bitaziguye na Koreya ya Ruguru mu gihe umwuka mubi ukomeje kwiyongera mu karere iherereyemo. Seoul yizeye ko ibiro by’u Busuwisi bizafasha kuvugana na Pyongyang.
U Busuwisi bwafunguye ku mugaragaro ibiro bibuhagarariye muri Koreya ya Ruguru mu gihe Ignazio Cassis yabaye Minisitiri w’Ububanyi n’Amahanga wa mbere w’u Busuwisi wasuye icyo gihugu kuva mu 2003.
Cassis yasuye Pyongyang ku itariki ya 29 na 30 Ukwakira mbere yo kujya i Seoul muri Koreya y’Epfo. Mu itangazo ryasohotse ku wa Gatandatu ushize, Minisiteri y’Ububanyi n’Amahanga y’u Busuwisi yavuze ko uru rugendo rugamije kugarura ibiganiro bya politiki bitaziguye na Koreya ya Ruguru mu gihe u Busuwisi bushaka gukomeza kuvugana n’impande zombi z’igihugu cyacitsemo ibice.
Ibiro bihagarariye u Busuwisi muri Koreya ya Ruguru byasubukuye ibikorwa ku itariki ya 19 Ukwakira. Bizajya bikurikiranwa na Ambasade y’u Busuwisi i Beijing, izakomeza inshingano zijyanye n’umubano ushingiye kuri dipolomasi na Koreya ya Ruguru. Ibi biro by’u Busuwisi byahozeho i Pyongyang bishinzwe ubufatanye mu by’ubutabazi mbere yo gufunga mu 2020 mu gihe cy’icyorezo cya COVID-19.
Ibi bihugu byombi byakomeje umubano wa dipolomasi kuva mu 1974, ariko ibiganiro bya politiki bisanzwe hagati yabyo byarahagaze nyuma ya 2019.
Bern yavuze ko ibiro bizafasha u Busuwisi gukorana neza n’abayobozi ba Koreya ya Ruguru no gukurikirana ibibera mu karere.
Mu ruzinduko rwe, Cassis yahuye na Minisitiri w’Ububanyi n’Amahanga wa Koreya ya Ruguru, Choe Son Hui, na Jo Yong Won, Umunyamabanga wa Komite Nkuru y’Ishyaka ry’Abakozi riri ku butegetsi.
Ibiganiro bye na Choe byagarutse ku kugarura ibiganiro bya politiki, umutekano karere Koreya iherereyemo n’ibibazo by’umutekano muri rusange mu Burayi no muri Aziya.
Aganira n’Ibiro Ntaramakuru byo mu Busuwisi, Keystone-ATS, kuwa Gatandatu, Cassis yavuze ko yatanze ubufasha bw’u Busuwisi mu koroshya ibiganiro kugira ngo bigabanye amakimbirane mu gace Koreya iherereyemo. Yavuze ko igitekerezo gisa n’icyakiriwe neza.
Ibiro Ntaramakuru bya Koreya ya Ruguru, KCNA, byatangaje kuwa Gatandatu ko abaminisitiri bombi baganiriye ku bufatanye bushingiye kuri dipolomasi n’ibibazo mpuzamahanga mu "mwuka wa gicuti." Ntihatanzwe ibisobanuro birambuye ku biganiro.
Ikinyamakuru Euronews cyabajije niba ibi biro bishobora gufasha mu biganiro byagutse by’u Burayi na Pyongyang, Umuvugizi wa Minisiteri y’Ububanyi n’Amahanga y’u Busuwisi avuga ko nta cyo bakongera ku itangazo ryo kuwa Gatandatu.