Umugabo wo muri Pakistan yatawe muri yombi akurikiranyweho gutanga umukobwa we w’imyaka itatu ngo ashyingiranwe n'umugabo w’imyaka 60, nyuma y’uko bivugwa ko hari amafaranga yari yumvikanyweho kugira ngo uwo mwana ahabwe uwo mugabo.
Uyu mugabo witwa Abdul Baqi, ukomoka mu mujyi wa Chaman mu ntara ya Balochistan, yafashwe n’inzego z’umutekano nyuma y’uko inkuru y’uko umukobwa we yari agiye gushyingirwa ikwirakwiye.
Polisi yavuze ko Abdul Baqi yari yumvikanye n’umugabo witwa Salah Uddin ko azamuha umukobwa we, hakabaho kwishyura amafaranga angana na miliyoni 2.5 z’amafaranga ya Pakistan.
Aya masezerano yari ashingiye ku muco uzwi nka ‘walwar’, aho umuryango w’umugabo uha amafaranga umuryango w’umukobwa kugira ngo umubano w’ubushyingiranwe ushyirweho.
Icyakora, iperereza ryakozwe n’inzego z’ibanze ryagaragaje ko nubwo ayo masezerano yari yaranditswe, amafaranga yari yumvikanyweho yari atari yatangwa.
Amakuru avuga ko iyo amafaranga aza gutangwa, uwo mwana w’imyaka itatu yari gufatwa nk’umugore wa Salah Uddin, nubwo amategeko yo muri Balochistan abuza gushyingira abana bato.
Nyuma y’uko iki kibazo kimenyekanye, polisi yataye muri yombi se w’umwana, mu gihe Salah Uddin we yahise aburirwa irengero. Polisi yatangaje ko iri kumushakisha kugira ngo na we akurikiranwe kuri iki kibazo.