Urubanza rw’umuhanzi mu itsinda rya Vestine na Dorcas, Ishimwe Vestine, n’umugabo we Idrissa Jean Luc Ouedraogo, rwasubitswe n’Urukiko rw’Ibanze rwa Kicukiro.
Kuri uyu wa Gatatu tariki ya 30 Nzeri 2026, Idrissa yitabye urukiko kugira ngo haburanwe ku kirego yatanze asaba ko ahabwa uburenganzira bwo kubona umwana avuga ko yabyaranye na Vestine, ndetse hakagenwa isano bafitanye hifashishijwe isuzuma rya ADN.
Idrissa yitabye urukiko ari kumwe n’abanyamategeko be, mu gihe Vestine yari ahagarariwe n’umunyamategeko we, kuko kuri ubu ari muri Canada.
Iki kirego cyatanzwe mu gihe hagati ya Idrissa na Vestine hari n’urundi rubanza rw’ubutane. Vestine ni we watanze ikirego asaba ko batandukana burundu, mu gihe Idrissa atemeranya n’impamvu z’ubutane zatanzwe n’umugore we.
Mu kirego cye, Idrissa avuga ko kuva umwana avuka atigeze amubona, nubwo avuga ko yakomeje gusaba ko yamwerekwa. Yasabye urukiko ko iki kibazo cyabanza gukemurwa mbere y’uko urubanza rw’ubutane rutangira kuburanishwa mu mizi.
Yanasabye ko we n’umwana bakorerwa isuzuma rya ADN kugira ngo hamenyekane neza niba koko ari umubyeyi w’uwo mwana. Avuga ko kumenya ukuri ku isano bafitanye byamufasha kumenya inshingano agomba kugira ku mwana.
Idrissa kandi avuga ko afite impungenge ko gutandukana burundu na Vestine bishobora gutuma kubona umwana birushaho kugorana, cyane ko Vestine aba mu mahanga.
Ku rundi ruhande, Vestine ni we watanze ikirego cy’ubutane. Mu byo yagaragaje, yavuze ko yafashe umwanzuro wo gutandukana n’umugabo we nyuma y’ibibazo avuga ko byaturutse ku kuba yaramenye ko Idrissa yari asanzwe afite abandi bagore.
Idrissa ahakana ibyo ashinjwa, avuga ko ibyo Vestine ashingiraho asaba ubutane bitigeze bibaho. Uruhande rwe kandi ntirushyigikiye icyifuzo cy’ubutane.
Urubanza rw’ubutane rwageze ku nama ntegurarubanza yabaye ku wa 14 Nzeri 2026, aho impande zombi zari zihagarariwe n’abanyamategeko.
Urukiko rw’Ibanze rwa Kicukiro rwashyizeho tariki ya 3 Ukuboza 2026 kugira ngo urubanza rw’ubutane ruzaburanishwe.
Kugeza ubu, urukiko ntirurafata umwanzuro ku cyifuzo cya Idrissa kijyanye no kubona umwana no gukorerwa isuzuma rya ADN.