Minisiteri y'Ingabo ya Amerika yatangaje ko izica uwahoze afite ipeti rya "major" mu ngabo z'igihugu hakoreshejwe itsinda ry’abarashi, akaba ari bwo bwa mbere mu myaka 65 ishize, umusirikare wakatiwe igihano cy'urupfu azaba yishwe muri ubu buryo.
Nidal Hasan yarashe abasirikare 13 ba Amerika badafite intwaro ku birindiro bya Fort Hood mu 2009, akomeretsa abandi 32.
Umuvugizi wa Pentagon, Sean Parnell, yatangaje ku mbuga nkoranyambaga kuwa Mbere, ko Minisitiri w’Ingabo, Pete Hegseth, ari we watanze igitekerezo kandi Perezida Donald Trump agiha umugisha.
Kizaba ari cyo gihano cya mbere cya gisirikare gitanzwe hakoreshejwe itsinda ry’abarashi, rizwi nka "Firing squad" mu Cyongereza, kuva Intambara ya Kabiri y’Isi Yose yarangira nk'uko bitangazwa na BBC.
Parnell yatangaje ko Minisitiri w'Ingabo za Leta Zunze Ubumwe za Amerika ari we uzagena igihe n’ahantu igihano cyo kwicwa kizashyirirwa mu bikorwa.
Yanditse kuri X ati: "Umunsi w’urubanza wa Hasan warageze."
Hasan, wari umuganga w’indwara zo mu mutwe mu Ngabo za Amerika ukomoka muri Virginia, yishe abasirikare 13 ku kigo cya gisirikare muri Texas mu mwaka wa 2009, nyuma yemera imbere y’urukiko ko ari we wabarashe ndetse asaba imbabazi ku bw’ "amakosa ayo ari yo yose" yakoze.
Mu rubanza rwe rwaburanishijwe n'urukiko rwa gisirikare mu mwaka wa 2013, yavuze ko yumvaga arimo kurengera Abayisilamu n’umutwe w'Abatalibani muri Afghanistan.
Ubwo bwicanyi bwabaye ku itariki ya 5 Ugushyingo 2009 nibwo bukomeye bwabaye kurusha ubundi bwakozwe mu gihe kitari icy'intambara ku birindiro by’Ingabo za Amerika.