Abayobozi ba Amerika batangaje ku Cyumweru ko umugore yatawe muri yombi na FBI ashinjwa kuba intasi y'u Bushinwa muri Leta Zunze Ubumwe za Amerika.
Wanying Z., w'imyaka 34, wo muri Irvine, muri California, yafatiwe ku Kibuga cy'Indege Mpuzamahanga cya Los Angeles mbere y'uko indege yerekeza mu Bushinwa ihaguruka.
Akurikiranweho ibyaha byo kuba umukozi w'amahanga utaranditswe nk'uko inkuru dukesha Deutsche Welle ivuga.
Uyu mugore "yagiye muri Seattle mu 2025, kandi, ku mabwiriza y'abayobozi ba (Repubulika ya Rubanda y'u Bushinwa), atangira kugenza umuntu wa hafi mu muryango we ukorera Leta ya Taiwan, yohereza amafoto, videwo n'amakuru ya plaque z'imodoka, kuri abo bayobozi," nk'uko byatangajwe n'Umufasha wa Mbere w'Umushinjacyaha wa Leta Zunze Ubumwe za Amerika, Bill Essally, mu nyandiko ye kuri interineti.
Yongeyeho ko Z. "yateguye urwo rugendo afatanyije n’undi muntu, akoresha amayeri yo kwihishira kugira ngo atamenyekana."
Nk’uko Essayli yabyanditse, biteganyijwe ko uwo mugore yitaba urukiko rwa Leta Zunze Ubumwe za Amerika i Los Angeles kuri uyu wa Mbere, itariki 5 Ukwakira 2026.
FBI yatangaje ko Z. yari arimo gutata umuhungu wa Perezida wa Taiwan, Lai Ching-te. Nubwo urwo rwego rwa Amerika rugenza ibyaha rutatangaje izina ry’uwo muntu wari ugambiriwe, nyuma rwashyize ahagaragara inkuru yo mu kinyamakuru New York Post ivuga ko ari uwitwa Lai Ting-yu, bivugwa ko aba muri Amerika.