Vital Kamerhe, umwe mu banyapolitiki bakomeye muri Repubulika Iharanira Demokarasi ya Congo, yagaragaje ko ashyigikiye Perezida Félix Tshisekedi mu gihe Joseph Kabila wahoze ayobora iki gihugu yatangaje ishingwa ry’ihuriro rya politiki n’igisirikare rya Front pour la Refondation de la Nation (FRN) rigamije kurwanya ubutegetsi buriho.
Mu jambo Kamerhe yavuze mu ijoro ryo ku wa 13 rishyira ku wa 14 Ukwakira 2026, yanenze icyemezo cya Kabila cyo kuyobora iri huriro ririmo n'abari abayobozi ba AFC/M22, avuga ko bidakwiye kuvuga ko ushaka amahoro mu gihe ukoresha intwaro.
Kamerhe yavuze ko hari ukudahuza hagati yo guhamagarira Abanye-Congo ibiganiro by’amahoro no kwitabaza urugamba rw’intwaro. Yagaragaje ko abayobozi bakwiye kugaragaza uruhare rwabo mu gushakira igihugu ibisubizo aho gushyira amakosa yose ku babasimbuye ku butegetsi.
Yanibukije ko Kabila yamaze imyaka 18 ayobora RDC, avuga ko icyo gihe cyari amahirwe yo gukomeza inzego za Leta, ingabo no kurinda abaturage.
Kamerhe yongeye kugaragaza ingaruka z’intambara ku baturage, zirimo imiryango ibura abayo, abana batiga n’abaturage bahunga ingo zabo.
Yashimangiye ko ashyigikiye Tshisekedi, asaba Abanye-Congo gushyira imbere ubusugire bw’igihugu, ubusugire bw’ubutaka bwacyo n’iyubahirizwa ry’Itegeko Nshinga. Yasabye kandi ko ibibazo bya politiki n’umutekano byakemurwa binyuze mu biganiro aho gukomeza gukoresha intwaro.
Ati: “Nongeye gushimangira ko nshyigikiye Perezida wa Repubulika, Félix-Antoine Tshisekedi Tshilombo, umufatanyabikorwa wanjye n’uwo dufatanyije muri politiki. Ibi bimaze kuba birushaho kugaragaza ko, uko mbibona, yari afite ukuri mu miburo yatangaga ku bijyanye n’iterabwoba yari yarabonye ko riri imbere y’igihugu. Ibi biradusaba kurushaho kwishyira hamwe mu kurengera ubusugire bw’igihugu, ubusugire bw’ubutaka bwacyo no kubahiriza Itegeko Nshinga.”
FRN yatangajwe ku wa 12 Ukwakira 2026 i Goma.
Kabila yavuze ko iri huriro rigamije guhuza imitwe irwanya ubutegetsi bwa Tshisekedi, ndetse ko rizakoresha uburyo bwose bushoboka, harimo n’imbaraga za gisirikare, kugira ngo rihindure ubutegetsi buriho.
Iyi ntambwe yongeye gukaza umwuka wa politiki mu gihugu no guteza ibibazo ku biganiro by’amahoro bikomeje kubera i Doha.
Vital Kamerhe wagaragaje ko adashyigikiye FRN afite amateka maremare muri politiki ya RDC. Ku butegetsi bwa Joseph Kabila, yabaye umuyobozi w’ishyaka PPRD ushinzwe ibikorwa byo kwiyamamaza kwa Kabila mu matora ya Perezida yo mu 2006, nyuma atorerwa kuyobora Inteko Ishinga Amategeko kuva mu 2006 kugeza mu 2009.
Yeguye kuri uwo mwanya nyuma yo kutumvikana n’ubutegetsi ku bijyanye n’ibikorwa bya gisirikare by’ingabo z’u Rwanda zinjiye muri RDC icyo gihe. Mu 2010 yashinze ishyaka Union pour la Nation Congolaise (UNC), aza kwiyamamariza kuyobora igihugu mu 2011.
Mu matora ya Perezida yo mu 2018, Kamerhe yishyize hamwe na Félix Tshisekedi, amufasha mu bikorwa byo kwiyamamaza. Tshisekedi amaze gutsinda, Kamerhe yagizwe umuyobozi w’ibiro bya Perezida, umwanya yabayeho kugeza mu 2020, ubwo yatabwaga muri yombi akurikiranyweho kunyereza umutungo mu rubanza rwa gahunda y’iminsi 100.
Mu 2022, Urukiko rw’Ikirenga rwatesheje agaciro igihano yari yarahawe. Yaje kugirwa Minisitiri w’Intebe wungirije ushinzwe ubukungu mu 2023, nyuma atorerwa kuyobora Inteko Ishinga Amategeko muri Gicurasi 2024, umwanya yeguyeho muri Nzeri 2025.