Umufana ukomeye wa Manchester United amaze imyaka ibiri atogosha umusatsi, nyuma yo kwiyemeza ko atazongera kuwogosha kugeza ubwo ikipe akunda izatsinda imikino itanu yikurikiranya.
Frank Ilett, umufana w’imyaka 30 ukunda Manchester United, yatangiye uyu mukoro mu myaka ibiri ishize agamije gusetsa no gushimisha bagenzi be bafana iyi kipe mu gihe yari iri mu bihe bitari byiza.
Icyo gihe yatekerezaga ko bitari bumare igihe kinini. Gusa nyuma y’imyaka ibiri, umusatsi we wabaye muremure kuko Manchester United itarabasha kubona intsinzi eshanu zikurikiranye.
Mu butumwa yashyize ku mbuga nkoranyambaga ubwo hizihizwaga imyaka ibiri atogosha, Ilett yavuze ko atigeze atekereza ko uyu mukoro wari kuzagira uruhare runini mu buzima bwe.
Yatangaje ko yawutangiye ku munsi nk’uyu mu myaka ibiri ishize, agamije gusa gukwirakwiza urwenya mu bafana ba Manchester United mu gihe ikipe yari itangiye kugorwa no kubona umusaruro uhoraho.
Ilett yatangiye uyu mukoro ubwo Manchester United yari imaze kwegukana FA Cup ndetse yari yaranabashije gutsinda imikino itanu yikurikiranya mu mezi yari yabanje.
Gusa nyuma y’imikino 10 ya shampiyona ya 2024/25, Manchester United yari ifite intsinzi eshatu, inganya imikino ine, itsindwa itatu.
Nyuma y’imyaka ibiri, uyu mufana aracyategereje izo ntsinzi eshanu zikurikiranye.
Mu ntangiriro za shampiyona ya 2026/27, Manchester United imaze gukina imikino irindwi, aho yatsinzemo ibiri, inganya ibiri ndetse itsindwa itatu.
Ibi bivuze ko Ilett agomba gukomeza gutegereza mbere yo kujya kogosha umusatsi we.