Minisiteri ishinzwe ubwikorezi muri Bulgaria yavuze ko ingabo zirwanira mu kirere zohereje indege y’indwanyi ya MiG-29 kugira ngo iherekeze indege ya kompanyi yo muri Autrichia nyuma yo kwikangamo igisasu.
Kuri iki Cyumweru, ubwoba bw’igisasu mu ndege ya Austrian Airlines yari ivuye i Tel Aviv yerekeza i Vienne, bwatumye indege yoherezwa kugwa muri Bulgaria, nk'uko abayobozi ba Bulgaria na sosiyete y’indege babitangaza.
Minisiteri ishinzwe gutwara abantu n'ibintu muri Bulgaria mu itangazo ryayo yatangaje ko abakozi ba Austrian Airlines bahisemo kugwisha indege mu buryo bwihutirwa mu Mujyi wa Sofia nyuma yo kuvugwa ko indege irimo igisasu igihe yari yegereye Romania. Bongeyeho ko, abagenzi bavanywe mu ndege nyuma yo kugwa.
Iyi sosiyete y'indege yabwiye Ibiro Ntaramakuru AFP ko abagenzi 51 n'abakozi batandatu bari muri iyo ndege kandi ko gushakisha mu ndege, Airbus A320, byatangiye nyuma yo kugwa neza muri Sofia, nyuma y'isaha imwe hakiriwe amakuru y’uko indege irimo igisasu.
Ibi bije nyuma y’iminsi mike habaye igikorwa cyatangaje Isi yose, ubwo abapilote babiri b’indege ya Fly Dubai yerekezaga i Tel Aviv, barwaniraga mu kirere mu ndege, umupilote wungirije agatera icyuma umupilote mukuru, aho byavuzwe ko yashakaga gukoresha impanuka indege, ariko umwe mu bagenzi agatabara.