Butembo: Umuyobozi mu ishyaka UDPS rya Tshisekedi yicishijwe inkoni azira ebola

Umuyobozi mukuru mu ishyaka riri ku butegetsi muri Repubulika ya Demokarasi ya Congo yicishijwe inkoni nyuma yo kwitabira ikiganiro kuri radiyo cyo kwigisha abaturage ibijyanye n’icyorezo cya Ebola, nk’uko byatangajwe n’uhagarariye iryo shyaka ku wa Mbere.
‎
Ibi byabereye, ku Cyumweru, i Butembo, mu Ntara ya Kivu y’Amajyaruguru, ahagaragaye cyane icyorezo cya Ebola muri iyi minsi.
‎
Marie-Celestin Karondwa, uyobora by’agateganyo komite ishinzwe imiyoborere mu ishyaka UDPS i Butembo akaba n’umuvugizi waryo, yagabweho igitero n’abaturage bo mu gace atuyemo nyuma yo kugaragara mu kiganiro kuri radiyo aho yasobanuraga ingamba zo kwirinda Ebola, nk’uko byatangajwe n’ishyaka UDPS i Butembo mu itangazo ryashyizwe ahagaragara.
‎
Iryo shyaka rivuga ko abamugabyeho igitero bamukubise, bakiba ibintu bye ndetse bagatwika inzu ye. Ntabwo byahise bimenyekana neza abakoze icyo gikorwa, umubare wabo cyangwa impamvu yatumye bagikora.
‎
Gusa ishyaka ryavuze ko Karondwa ari "umuntu w'inzirakarengane, wazize kuba yaravugiye ku mugaragaro ibyo ishyaka ryemera ku bijyanye no kuba virusi ya Ebola ihari n’akaga iteje abaturage."
‎
Nyuma yaho, Karondwa yaje gupfa azize ibikomere yari yatewe, nk’uko ishyaka ryabitangaje. Umuyobozi w’Umujyi wa Butembo ntiyahise agira icyo avuga kuri iki kibazo ubwo yabisabwaga.
‎
Inkuru yatangajwe na Reuters ivuga ko iki ari kimwe mu bitero byagiye bigabwa ku matsinda ashinzwe kurwanya Ebola, bikaba bigaragaza kutizerana hagati y’abaturage n’inzego zishinzwe guhangana n’icyo cyorezo.
‎
Ku wa Gatandatu, abantu bitwaje intwaro bagabye igitero ahantu hagenewe gukarabirwa intoki hafi ya Teritwari ya Beni, bica nibura umuntu umwe ndetse bakomeretsa abandi benshi, nk’uko byatangajwe na sosiyete sivile yo muri ako gace.
‎
Iki cyorezo, cyatangajwe ku mugaragaro ku wa 15 Gicurasi, kimaze kwibasira abantu 8,067 no guhitana 3,901, nk’uko bigaragazwa n’imibare ya Leta yasohowe ku wa Mbere.