Fizi: AFC/M23 yakunjiye hamwe FARDC, FDNB, FDLR na Wazalendo irakubita bakizwa n'amaguru

‎Imirwano ikomeye ahitwa Mboko na Ng'ombe, hafi ya Kilembwe, mu Murenge wa Lulenge muri Gurupoma ya Basimimbi, kuva mu ijoro ryo ku Cyumweru, itariki ya 27 Nzeri 2026 no kuwa Mbere umunsi wose, yahuje abarwanyi ba AFC/M23/Twirwaneho n’Ingabo za Repubulika ya Demokarasi ya Congo (FARDC), Ingabo z'u Burundi n’inyeshyamba za Wazalendo hamwe na FDLR, birangira aba bayabangiye ingata bamwe bahungira Fizi-centre abandi bahungira Makembe.
‎
Nk’uko amakuru ava muri ako gace abivuga, abarwanyi ba AFC/M23 bateye banyuze kuri axe ya "Mboko na Ng'ombe," bagwa mu birindiro by’inyeshyamba z'Abanyarwanda n'iz'Abarundi, by’umwihariko iziyoborwa na Komanda Nzabampemba (w’Umurundi) n’abayoborwa na Komanda Théophile wo mu mutwe wa FDLR/Hamada.
‎
Imirwano yabereye mu nzira ijya i "Maléngé," hafi y’ahazwi nka "Deux-Maisons," muri Gurupoma ya Basimimbi (umudugudu wa Makembe/Babungwe) mu majyepfo y'Umurenge wa Lulenge nk'uko bitangazwa na Tazama RDC.
‎
Iyi mirwano yatangiye ku Cyumweru yakomeje no ku munsi wose wo kuwa Mbere, itariki ya 28 Nzeri 2026 nk'uko amakuru avuga.
‎
‎Kubera iyo mirwano kuri iyi nzira yinjira mu Ntara ya Tanganyika muri Grand Katanga, abarwanyi bose ba Wazalendo bari mu mujyi w’ubucukuzi bwa zahabu wa Misisi (mu majyepfo ya Teritwari ya Fizi) bahatiwe kuva muri ako gace bajya gushinga ibirindiro byabo ahitwa Makembe kugira ngo babuze abarwanyi ba AFC/M23 gukomeza imbere.
‎
Nanone mu Murenge wa Lulenge, ku muhanda wa Abangya (Kabanja), bivugwa ko abasirikare benshi b’Ingabo z’u Burundi (FDNB) bataye urugamba berekeza muri Fizi-Centre nyuma y’imirwano ikomeye bahuriyemo n'abarwanyi ba AFC/M23.
‎
Kugeza ubu nta mibare y’abapfuye cyangwa abakomerekeye muri iyo mirwano iratangazwa n’impande zombi na cyane ko Guverinoma ya Congo yahagaritse serivisi z’itumanaho na interineti mu karere kose ka Fizi kuva ku wa 3 Nyakanga 2026; ibi bikaba biuma bigora cyane abaturage bo muri aka gace ka Repubulika ya Demokarasi ya Congo gutumanaho n’abandi.