Igikomangoma cya Saudi Arabia, Mohammed bin Salman, bivugwa ko cyimuriwe mu ngoro y’umwami ifite umutekano ukomeye n’ubuhungiro bwo munsi y’ubutaka, mu gihe iki gihugu gihanganye n’ibitero bishobora kugabwa n’inyeshyamba za Houthi zo muri Yemen.
Amakuru yatangajwe n’ibitangazamakuru birimo The Wall Street Journal, avuga ko umutekano wa Mohammed bin Salman wakajijwe, ku buryo agenda agaragara mu ruhame gake kandi arindwa n’abashinzwe umutekano batoranyijwe by’umwihariko.
Bivugwa kandi ko ashobora kwimurirwa hagati y’inyubako zitandukanye zirinzwe cyane, hagamijwe kugabanya ibyago by’ibitero bishobora kumugabwaho.
Izi mpungenge zije mu gihe Saudi Arabia ihanganye n’iterabwoba ry’ibitero bya misile n’indege zitagira abapilote bishinjwa umutwe wa aba-houti. Amakuru amwe avuga ko ibitero byibasiye ibikorwaremezo bikomeye, birimo Ikibuga cy’Indege Mpuzamahanga cya King Khalid i Riyadh.
Hari kandi amakuru avuga ko Saudi Arabia ishobora kuba ihanganye n’ikibazo cy’ubuke bwa misile zikoreshwa mu kurasa izindi ziri mu kirere, ibintu bishobora gushyira igitutu ku bushobozi bwayo bwo kurinda ibikorwaremezo by’ingenzi n’inyubako z’ubuyobozi.