Bwiza

Imirwano yongeye kubura hagati ya FARDC na FRN i Bunyakiri

Amakuru•
Denis Nsengiyumva
By Denis Nsengiyumva
•Kuwa Mbere, 16 Ugushyingo 2026 saa 14:01
Imirwano yongeye kubura hagati ya FARDC na FRN i Bunyakiri

Imirwano ikomeye yongeye kubura kuri uyu wa Mbere, itariki ya 16 Ugushyingo 2026, hagati y'abarwanyi ba FRN n'Ingabo za Congo, zishyigikiwe n'imitwe ya Wazalendo.
‎
Biravugwa ko iyi mirwano yabereye i Kambali, muri Teritwari ya Kalehe muri Kivu y'Amajyepfo, mu burasirazuba bwa Repubulika ya Demokarasi ya Congo.
‎
Amakuru ava muri ako gace agera kuri Kivu Morning Post, dukesha iyi nkuru, avuga ko ibitero byagabwe n'Ingabo za Congo (FARDC) ku birindiro bya FRN mu Murenge wa Bunyakiri, ahumvikanye urusaku rw'intwaro ziremereye.
‎
Ejo hashize ku Cyumweru, byibuze ibitero bitandatu bya drones byagabwe i Bunyakiri. Nk'uko amakuru ava muri ako gace akomeza abivuga, abamotari babiri biciwe mu gace ka Bulambika i Bunyakiri muri kimwe muri ibi bitero bya drones.
‎
Abaturage bavuga ko ibikorwa remezo by'abaturage byibasiwe n'ibitero bya drones z'Ingabo za Congo birimo Institut Kafunda, icyahoze ari ibiro by'ubuyobozi, n'agace gakikije umunara wa Airtel.
‎
Mu itangazo ryashyizwe ahagaragara, FRN yashinje ihuriro ry'ingabo zirwanira ubutegetsi bwa Kinshasa kurasa ibisasu mu duce twa Bulambika na Kambali, ndetse no mu duce tuhakikije zikoresheje indege zitagira abapilote za “kamikaze”.
‎

Denis Nsengiyumva

Inkuru yanditswe na: Denis Nsengiyumva

Umunyamakuru wa BWIZA.COM wanditse inkuru 11,310.