Perezida wa Koreya y'Epfo, Lee Jae Myung, yateye ubwoba ko azafata "izindi ngamba" atasobanuye neza niba Ukraine idasabye imbabazi ku mugaragaro kubera ko yahishuye ko imfungwa ebyiri za Koreya ya Ruguru zoherejwe mu y’epfo.
Umuyobozi wa Ukraine, Volodymyr Zelensky, yabitangarije Inteko Rusange y'Umuryango w'Abibumbye mu cyumweru gishize, birakaza Seoul, yavuze ko iki gikorwa cyagombaga gukomeza kuba ibanga.
Minisitiri w'Ububanyi n'Amahanga wa Ukraine, Andrii Sybiha, kuwa Kane, yavuze ko iki kibazo ari "ukutumvikana neza mu rwego rwa dipolomasi", yongeraho ko Kyiv irimo "gukora" ibishoboka kugira ngo ikemure ikibazo.
Perezida Lee ariko yamaganye ibi bisobanuro kuri X, avuga ko ari ikibazo "cy'icyubahiro cy'abaturage ba Koreya n'igihugu".
Ibiro bya Lee byavuze mu cyumweru gishize ko ari Ukraine yasabye ko iki gikorwa cyagirwa ibanga, igice kimwe kikaba cyari kigamije kurinda imiryango y’Abanyakoreya ya Ruguru, kandi kubera ko Kyiv yashakaga kwirinda kunengwa ko yaretse amahirwe yo guhererekanya abasirikare b’imfungwa z’intambara za Ukraine.
Ibiro bya Zelensky byasubije, bivuga ko ibihugu byombi nta masezerano nk’ayo bifite yo kugira ibanga iki gikorwa, birushaho kongera amavuta mu muriro nk'uko inkuru dukesha BBC ikomeza ivuga.
Lee ubwe yanenzwe cyane mu gihugu cye nyuma y’uko Zelensky abitangaje, aho abatavuga rumwe n’ubutegetsi muri Koreya y’Epfo bamushinje guhisha iki gikorwa kugira ngo ashimishe Pyongyang (Umurwa mukuru wa Koreya ya Ruguru).
Aba basirikare babiri, bari mu bihumbi by’Abanyakoreya ya Ruguru bagiye gufasha u Burusiya mu ntambara yo muri Ukraine, bari babanje kubwira itangazamakuru ryo muri ako gace ko bifuza koherezwa muri Koreya y’Epfo.