Isoko rya Musanze rizwi nka Goico, kuri uyu wa Gatandatu tariki ya 10 Ukwakira ryibasiwe n'inkongi ikomeye y'umuriro.
Mu ma saa kumi y'igicamunsi ni bwo iri soko ryatangiye gushya.
Amakuru BWIZA yamenye avuga ko umuriro wadutse mu igorofa rya gatanu risanzwe rikoreramo abiganjemo abakora ubucuruzi bwa caguwa n'abadozi mbere yo gufata n'ibindi bice by'isoko.
Umwe mu barikoreramo yabwiye BWIZA ati: "Umuriro watangiriye mu igorofa rya gatanu uramanuka ugera muri kane na gatatu, rimwe na kabiri ni ho honyine utageze."
Abajijwe ku cyaba cyateye iyi nkongi, uyu mucuruzi yagize ati: "Ntabwo biramenyekana. Bamwe baravuga ko hari abarimo barasudira, abandi bakavuga ko hari uwateraga ipasi, ariko umuriro wari waniriwe uri kugenda ku buryo bikekwa ko na wo waba wabigizemo uruhare, kuko ubwo wazaga ni bwo byabaye."
Undi muturage wavuganye na BWIZA saa 17:50, yavuze ko "inkongi y'umuriro yamaze kugera muri rimwe, Polisi n'ingabo baracyagerageza kurwana n'umuriro."
Kugeza ubu impamvu nyayo y'iriya nkongi, ingano n'agaciro k'ibyangijwe na yo ntibiramenyekana.
Ubwo twakoraga iyi nkuru imodoka zibarirwa muri eshanu z'ishami rya Polisi rishinzwe kuzimya inkongi zari zatangiye kuzimya umuriro, ariko ntiwari wakazimye.