Repubulika Iharanira Demokarasi ya Congo yatangaje ko yakuyeho umukandida wayo, Juliana Amato Lumumba, mu matora y’Umunyamabanga Mukuru w’Umuryango w’Ibihugu bikoresha Ururimi rw’Igifaransa (OIF), ishyigikira kandidatire ya Dacian Cioloș wo muri Roumanie.
Kinshasa yemeje aya makuru biciye mu tangazo ryasohowe na Minisiteri yayoby’Ububanyi n’Amahanga, Ubutwererane Mpuzamahanga, Francophonie n’Abanye-Congo baba mu mahanga. Ni itangazo ryasohorewe i i Phnom Penh muri Cambodge ku wa 14 Ugushyingo 2026, ahari kubera inama ya 48 y’Abaminisitiri b’ibihugu bigize Francophonie.
Uyu mujyi ni na wo uzatorerwamo Umunyamabanga Mukuru mushya wa Francophonie mu minsi ibiri iri imbere.
RDC yavuze ko yafashe icyemezo cyo kuvana Juliana Lumumba mu matora, mu rwego rwo gufasha ibihugu bigize OIF kugera ku bwumvikane no kugabanya umwuka mubi wari uri mu nzira yo gutora Umunyamabanga Mukuru mushya.
Kinshasa yashimye ubwitange bwa Juliana Amato Lumumba n’ubwiza bwa kandidatire ye, isobanura ko kumuvanamo bidashingiye ku kwanga ubushobozi bwe, imico ye cyangwa umusanzu ashobora gutanga.
Yunzemo iti: "Ubumwe bw’Umuryango busaba gushyira imbere umuntu ushobora guhuza ibihugu biwugize, guhangana n’ibibazo uhura na byo no kongera ubushobozi bwawo bwo kugira icyo ukora.”
RDC yibukije ko amatora y’Umunyamabanga Mukuru wa OIF asanzwe ashingira ku bwumvikane hagati y’ibihugu biyigize, ivuga ko ari yo mpamvu yahisemo gushyira imbere inzira y’ubwumvikane aho gukomeza guhatana mu gihe hari impaka.
RDC na Roumanie bishyigikiye Cioloș
Nyuma y’ibiganiro yagiranye na Romania, RDC yatangaje ko gukura mu matora Juliana Amato Lumumba bitanze inzira yo gushyigikira hamwe Dacian Cioloș, wahoze ari Minisitiri w’Intebe wa Roumanie akaba ari na we mukandida w’icyo gihugu.
RDC yavuze ko iyi ari intambwe igamije kwegera ubwumvikane bwagutse, ariko ishimangira ko kugira ngo ibyo bigerweho bisaba ko n’abandi bakandida n’ibihugu bibashyigikiye bagaragaza ubushake bwo kwemera ubwumvikane.
Iti: “Iyi ntambwe ntishobora kuba iy'uruhande rumwe. Dutegereje ko abandi bakandida n’ibihugu bibashyigikiye na bo bagaragaza ubushishozi, ubushake bwo guhinduka no gufungura inzira y’ubwumvikane.”
RDC yakuyeho umukandida wayo, mu gihe Louise Mushikiwabo w’u Rwanda aracyari mu bahatanira kuyobora OIF, aho ashaka kongera kuyobora uyu muryango muri manda ya gatatu.