Umuhanzi The Ben yegukanye igihembo cya Best East Africa Artist mu bihembo bya HiPipo Music Awards 2026, byatangiwe i Kampala muri Uganda mu ijoro ryo ku wa 13 Ugushyingo 2026.
The Ben yari ahatanye n’abandi bahanzi 11 bo muri Afurika y’Iburasirazuba barimo Diamond Platnumz, Ali Kiba, Harmonize, Bien, Joshua Baraka, Sheebah, Element EleéeH na Jose Chameleone.
Uyu muhanzi yari ahagarariye u Rwanda mu byiciro bitatu birimo Best East Africa Artist, Africa Number One na East Africa Best Act/Song, abikesha indirimbo ye yise ‘Inshallah’.
Nubwo yegukanye igihembo cya Best East Africa Artist, ibindi byiciro bibiri ntiyabashije kubitsindira. Igihembo cya Africa Number One cyegukanywe na Joshua Baraka, mu gihe icy’indirimbo nziza muri Afurika y’Iburasirazuba cyahawe ‘This Time’ ya Joshua Baraka afatanyije na JAE5.
‘This Time’ yatsinze izindi ndirimbo zari mu bahatanaga, zirimo ‘Inshallah’ ya The Ben, ‘Pom Pom’ ya Bruce Melodie yakoranye na Diamond Platnumz na Brown Joel, ‘Ayayaah’ ya Element EleéeH yakoranye na Bien na Joshua Baraka, ndetse na ‘Happy’ ya Diamond Platnumz.
Iki ni cyo gihembo cya kabiri The Ben atwaye muri HiPipo Music Awards mu myaka ibiri ikurikirana. Mu 2025, yari yegukanye igihembo cya Best East Africa Act/Song abikesha indirimbo ‘True Love’.
HiPipo Music Awards ni ibihembo bitegurwa n’ikigo HiPipo cyo muri Uganda. Byatangiye mu 2013, nyuma y’uko igikorwa cya HiPipo Charts Festival gitangijwe mu 2012. Ibihembo by’uyu mwaka byatanzwe ku nshuro ya 15, bigamije gushimira abahanzi n’abandi bagira uruhare mu guteza imbere umuziki muri Uganda, Afurika y’Iburasirazuba no muri Afurika muri rusange.