Mu kiganiro cyatambutse live kuri space ku Cyumweru, itariki ya 11 Ukwakira, cyari kiyobowe n'umunyamakuru Stanis Bujakera Tshiamala, Prof. Tharcisse Loseke, umwe mu bashinze ihuriro "Sauvons la RDC", ryari risanzwe riyoborwa na Joseph Kabila, yavuze ko gutandukana hagati y’uwahoze ari Perezida na Félix Tshisekedi kwabaye "burundu" kandi ashinja Tshisekedi kuba intashima.
Mu mpaka yagiranye na Jean-Claude Tshilumbayi, Visi Perezida wa mbere w’Inteko Ishinga Amategeko, yashinje Umukuru w’Igihugu uriho ubu kuba ari we nyirabayazana w’iki kibazo.
Yagize ati: "Yahawe ubutegetsi ku buryo bworoshye cyane" Nk’uko Tharcisse Loseke abivuga, Joseph Kabila ni we "wahaye ubutegetsi" Félix Tshisekedi mu 2019, avuga ko uyu atigeze "atorwa" koko.
Ubwo yabazwaga ku bijyanye n’uko Komisiyo y’Igihugu y’Amatora (CENI) n’Urukiko rushinzwe Kurinda Itegeko Nshinga byaratangaje kandi bikemeza intsinzi ya Félix Tshisekedi mu matora ya Perezida yo mu Kuboza 2018, uyu munyapolitiki utavuga rumwe n’ubutegetsi yakomeje kuvuga ko yahawe ubutegetsi "ku buryo bworoshye cyane" (ku isahani ya zahabu) kugira ngo ayobore igihugu "hakurikijwe amahame ya Repubulika."
Aho gukora ibyo, yavuze ko Umukuru w’Igihugu, Felix Tshisekedi, yiyegereje "itsinda ry’abantu bakunda ibinezeza n’ibisambo" byatumye DRC igera mu bibazo irimo ubu.
Perezida "wikunda" kandi "udashima"
Ku bwa Tharcisse Loseke, Joseph Kabila nta kibazo yari afitanye n’umusimbura we. Avuga ko Félix Tshisekedi ari we wagaragaje ko "yikunda," abitewe no kwifuza "kwiharira ubutegetsi igihe kirekire."
Asobanura uwahoze ari Perezida nk’ "umuntu ukunda amahoro" kandi watanze ubutegetsi "mu mahoro," Loseke yagaragaje ko yatangajwe n’imyitwarire ya Félix Tshisekedi yo kwitwara "nk'intashima" ku muntu wamuhaye ubutegetsi.
Gushyira inshuti ze mu myanya no kugira ahantu hihishe ho gufungira abantu
Uyu munyapolitiki utavuga rumwe n’ubutegetsi yanenze kandi bikomeye manda ya mbere y’umukuru w’igihugu, avuga ko muri icyo gihe nta kintu na kimwe yakoze ku bw’inyungu z’igihugu.
Yanenze imicungire y’ubukungu ishingiye ku gutonesha abantu no guha imyanya cyangwa amahirwe bene wabo n’inshuti (nepotisme), ndetse n’ingengo y’imari ya leta itarigeze ikoreshwa nk'uko amabwiriza abiteganya.
Ku bijyanye n’uburenganzira bwa muntu, yavuze ko uko ibintu bimeze ubu biteye inkeke cyane, agaragaza ko hariho ubwiyongere bukabije bw’ahantu hihariye hafungirwa abantu ndetse na kasho z’ibanga ziri kugenda zigaragara hirya no hino.
Hanyuma, yemeje ko muri iki gihe igihugu gifite abantu benshi bahunze kurusha uko byari bimeze ku gihe cya Joseph Kabila, agira ati: "Ntibishoboka no kubigereranya."
Ibi ariko byamaganwe na Hon. Jean-Claude Tshilumbayi watangiye abaza niba uko gutanga ubutegetsi na byo ari amahame ya repubulika, akomeza avuga ko ahantu hahoze hafungirwa abantu, cyane cyane ahazwi nka ONATRA, hahinduwe resitora na hotel.